Qazaqistanning sabiq ministiri altunbék öltürüldi


2006-02-14
Share

Qazaqistan prézidénti nursultan nazarbayéf 11-yanwar astanada ötküzülgen prézidéntliqqa qayta olturush qesem bérish murasimida qazaqistanning dölet bayriqini söymekte. AFP

Altunbék sersanbay'oghli, qoghdughuchisi we shopurining jesiti ‏13 ‏- féwral küni almuta shehirining sirtidiki bir yol yéqinida tipilghan. Sersanbay'oghli qazaqistanda üch ay ichide öltürülgen ikkinchi siyasiy öktichi hésablinidu.

Öktichiler öltürülmekte

Ötken yili noyabir éyida qazaqistan siyasiy öktichilirining yene bir rehbiri bolghan zamanbék nurqadilof özining öyide ölük tépilghan idi. Qazaqistan saqchi da'iriliri nurqadilof özini étip öltürüwalghan bolushi mumkin dep, yekün chiqarghan idi.

Sersanbay'oghlining jesitini we bashqa jesetlerni körgen qazaqsitan siyasiy öktichilirining bildürüshiche, her üchila kishi béshigha we arqisidin étip öltürülgen.

43 Yashliq sersanbay'oghli, 2003 ‏- yilighiche prézidént nazarbayifning eng yéqin ademliridin biri hésablinatti. Emma u 2003‏- yildin kéyin nazarbayif bilen hemkarlishishni toxtitip, siyasiy öktichilerning sépige qoshulghan.

Qazaqistandiki amérika bash elchixanisi bayanat élan qilip, qazaqistan hökümitini sersanbay'oghlining öltürülgenliki heqqide jiddiy tekshürüsh élip bérishqa chaqirdi. Shundaqla amérika tashqi ishlar minsitirliqining bayanatchisi amanda rojers harper 14 ‏- féwral küni washin'gtonda bergen bayanatida, sersanbay'oghlining öltürülgenliki heqqidiki tekshürüshni derhal bashlash kérek, dédi.

Amérika birleshme agéntliqining xewer qilishiche, qazaqistan prézidénti nursultan nazarbayif sersanbay'oghlining öltürülgenlikige teziye bildürüp, bu weqe toghrisida jiddiy bir tekshürüsh élip bérish üchün qazaqistan ichki ishlar ministiri bawur jan muhemmetjanofni wezipilendürgen.

Sersanbay'oghlining néme üchün we kimler teripidin öltürülgenliki melum emes. Emma qazaqistandiki siyasiy öktichiler, sersanbay'oghlining siyasiy seweblerdin öltürülgenlikini, uning öltürülüshide qazaqistan razwétka idarisining qoli barliqini bildürmekte.

Aq yol partiyisi: öltürüsh buyruqi yuqiridin kelgen

Aghiz aq yol partyisining yene bir rehbiri bolghan polat abilof, sersenbay'oghlini öltürüsh buyruqining qazaqistandiki hakimiyetning yuqiri qatlamliridin kelgenlikini bayan qilip, sersabay'oghli we nurqadilof, qazaqistandiki siyasiy öktichilerning sépige qoshulghan sabiq minsitirlar idi. Ular minsitirliq wezipisini ötewatqan chaghda, nazarbayifgha eng yéqin kishiler hésablinatti. Démek ular nahayiti köp ishlardin xewerdar idi, dédi.

Abilofning éytishiche, nurqadilof we sersanbay'oghlining öltürülüshi, burun qazaqistan hökümitining yuqiri qatlamlirida wezipe orundighan siyasetchilerge, qazaqistandiki öktichi heriket sépige qoshulmasliq toghrisida bérilgen bir agahlandurush bolushi mumkin iken. Uning déyishiche, emdi burun hakimiyette wezipe alghanlar qazaqistandiki siyasiy öktichiler sipige qoshulushtin qurqidu. Chünki ular bu sewebtin ölüp kétishi mumkin.

Eng küchlük siyasiy öktichi

Siyasiy mulahizichilerning éytishiche, sersanbay'oghli qazaqistandiki siyasiy öktichi heriket ichidiki eng küchlük rehber hésablinidiken.

2003‏- Yili qazaqistandiki siyasiy öktichilerning sépige qoshulghan sersanbay'oghli, 2005 ‏- yilida qazaqistandiki bir sot teripidin, nazarbayifning qizi dariga nazarbayiwaning bashqurushidiki xewer metbu'at shirkitini haqaretligen dep pul jazasigha höküm qilin'ghan. Xewerlerge qarighanda, sot jeryanida sersanbay'oghli dariga nazarbaywaning bu shirkitini qurush üchün qanunlarni depsende qilighanliqini ashkarilighan iken.

Roytirés agéntliqining xewer qilishiche, gerche qazaqistandiki siyasiy öktichiler qazaqistan hökümet emeldarlirini sersanbay'oghlining öltürülüshide qoli bar dep eyibligen bolsimu, emma prézidént nazarbayifni biwaste tilgha almighan. Ular nöwette chet'elde tetilini ötküzü'iwatqan nazar bayiftin, tetilini toxtitip qazaqistan'gha qaytip kélip, sersanbay'oghlining öltürülüshi toghrisida élip bérilidighan tekshürüsh ishini özi bashqurushini telep qilghanü

16 Yildin béri qazaqistanda hakimiyet yüzgüzüp kéliwatqan nursultan nazarbayif, yéqinda qazaqistanda ötküzülgen prézidént saylimida, awazlarning 91 pirsentini qolgha keltürüsh arqiliq qaytidin prézidént wezipisige saylandi. Gherb döletliri qazaqistanda ötküzülgen pérzidént saylimida nurghun saxtipezliklerning yüz bergenlikini bildürmekte. (Qanat)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet