قىرغىزىستان ھۆكۈمىتى ئۆكتىچىلەرنى سىياسى ئۆزگۈرۈش قوزغىماقچى، دەپ ئەيىپلىدى

قىرغىزىستان پايتەختى بېشكەكتە ئۆكتىچى پارتىيىلەرنىڭ نەچچە مىڭ كىشىلىك ھۆكۈمەتكە قارشى نامايىش جۈمە كۈنى 2 - كۈنىگە كىردى. قىرغىزىستان دائىرىلىرى ئۆكتىچىلەرنى ھۆكۈمەتكە قارشى سىياسى ئۆزگۈرۈش قوزغىماقچى، دەپ ئەيىپلىمەكتە.

قىرغىزىستان باش مىنىستىرى فلىكىس قۇلوۋ جۈمە كۈنى پارلامېنت يىغىنىدا ئۆكتىچى پارتىيە رەھبەرلىرىنى ھۆكۈمەت بىنالىرى ۋە دۆلەت تېلېۋىزىيە ئىستانسىسىنى تارتىۋېلىشنى پىلانلىغان، دەپ ئەيىپلەپ، بۇنىڭغا يول قويمايدىغانلىقىنى ئاگاھلاندۇردى. ئۇ، پارلامېنت يىغىنىدا ئۆكتىچى پارتىيە رەھبەرلىرىنىڭ ھۆكۈمەت بىناسى ۋە دۆلەت تېلېۋىزىيە ئىستانسىسىنى تارتىۋېلىش پىلانىغا دائىر بىر ئۈن ئالغۇ لىنتىسىنى قويغان. ئۆكتىچى پارتىيىلەر بولسا باقىيېۋ ھۆكۈمىتى قىرغىزىستاندا سىياسى ئىسلاھات ئېلىپ بېرىش ۋە ئاساسى قانۇننى ئۆزگەرتىش توغرىسىدىكى ۋەدىسىگە ۋاپا قىلمىدى، دەپ ئەيىپلىمەكتە.

پرېزىدېنت باقىيېۋ قىرغىزىستان رادىئوسىدا سۆزلىگەن نۇتۇقىدا بۇ ۋەقە"ئۆكتىچىلەرنىڭ ئاساسى قانۇنغا قىزىقمايدىغانلىقىنى يەنە بىر قېتىم ئىسپاتلاپ، ھاكىمىيەتنى زورلۇق كۈچكە تايىنىپ تارتىۋالماقچى بولىۋاتقانلىقىنى كۆرسەتتى،" دەيدۇ.

فرانسىيە ئاخبارات ئاگېنتلىقىنىڭ خەۋەر قىلىشىچە، جۈمە كۈنى بىر قىسىم ئۆكتىچى پارتىيە رەھبەرلىرى قىرغىزىستان دۆلەت تېلېۋىزىيە ئىستانسىسىغا بېسىپ كىرىپ، تېلېۋىزوردا سۆزلەشنى تەلەپ قىلغان بولسىمۇ، لېكىن كېيىنچە بۇ پىلانىدىن ۋاز كەچكەن. نۆۋەتتە بېشكەكتىكى مەركىزى مەيداندا 3000 نامايىشچى چىدىر تىكىپ نامايىش قىلماقتا.

ئىسلاھاتچىلار رەھبىرى ئازىمبېك بېكنەزەروۋ، " كونكىرىت ھەرىكەت قىلىدىغان ۋاقىت" نىڭ يېتىپ كەلگەنلىكىنى بىلدۈرگەن. ئۆكتىچىلەر رەھبىرى تەكەبايېۋ بولسا " قىرغىزىستان رەھبەرلىرىنى تىنچ يولدا ئىستىپابېرىشكە مەجبۇرلايدىغانلىقىنى بىلدۈردى. قىرغىزىستان ۋەزىيىتى 2005 - يىلى پرېزىدېنت ئاقايېۋ ئاغدۇرۇلغاندىن بېرى سىياسى داۋالغۇش ئىچىدە ئۆتمەكتە. (ئەركىن)