Qirghizistan prézidénti baqiyif yéngi bash ministirini teyinlidi

• Muxbirimiz qanatning bu heqtiki melumati
• Download story audio

Qirghizistan bash ministiri azim isabékof peyshenbe küni seherde wezipisidin istipa bergenlikini jakarlidi. Téxi ikki ay burun bash ministirliq wezipisige teyinlen'gen isaqbékofning istipasini derhal qobul qilghan qirghizistan prézidénti qurmanbék baqiyif, siyasiy öktichi we qirghizistan sotisiyal démokrat partiyisining re'isi almas atambayifni bash ministirliq wezipisige teyinlidi.

Xewerlerge qarighanda, gerche prézidént baqiyf qirghizistandiki siyasiy öktichi heriket bilen munasiwetlerning téximu keskinliship kétishining aldini élish üchün, özining uzun yilliq siyasiy ittipaqdishi bolghan isaqbékofni wezipisidin élip tashlap atambayifni bash ministirliq wezipisige teyinligen bolsimu, emma uning bu herikiti siyasiy öktichi heriketni razi qilalmighan. Eksiche, qirghizistandiki siyasiy öktichi heriketning radikal qanitini téximu ghezeplendürgen.

Roytris agéntliqining xewer qilishiche, qirghizistandiki eng chong öktichi heriketke rehberlik qiliwatqan sabiq qirghizistan bash ministiri filiks qolufning bayanatchisi azamat qalman, bizning meydanimiz éniq. Biz pilanimizni özgertmeymiz. Bizning meqsidimiz baqiyifning istpa bérishi we qirghizistanda prézidént saylimi ötküzüshtur. Atambayifning bash ministirliq wezipisige teyinlen'genliki prézidéntqa ishen'gili bolmaydighanliqini körsetti, dégen.

Qirghizistan ata-makan partiyisining re'isi kazimbék rahimqul'oghlu atambayifning bash ministirliq wezipisige teyinlen'genlikini qattiq tenqid qilip, prézidént baqiyifning bu herikitini, uning prézidéntliqini saqlap qilish üchün élip bériwatqan pa'aliyetlirining bir qisimi dep, körsetti. Kazimbék béshkekte bergen bayanatida "prézidént xelqning derdige chare tépish üchün emes, hakimiyet béshida qilish üchün atambayifni bash minstirliq wezipisige teyinligen. Bizche asasiy qanunni pütünley özgertip, yéngidin prézidént saylimi élip bérish kérek. Bundin bashqa héchqandaq tedbirni qobul qilmaymiz" dégen.

Qirghizistanda 2005‏- yili mart éyida yüz bergen siyasiy özgirishtin kéyin, waqtiliq prézidént wezipisini ötigen qurmanbék baqiyif, yene shu yili qirghizistanda ötküzülgen we xelq'ara közetküchiler teripidin adaletlik saylam dep körsitilgen prézidént saylimida, awazlarning mutleq köp qismini qolgha keltürüsh arqiliq prézidént wezipisige saylan'ghan idi. Lékin siyasiy öktichiler uni saylamdin burun asasiy qanun'gha özgertish kirgüzüsh we qirghizistan qanun hakimiyitini tiklep, chiriklikning kökini qurutush toghrisida bergen wedilirige emel qilmidi dep eyiblimekte.

Siyasiy mulahizichilerning éytishiche, qirghizistanda dawamlishiwatqan siyasiy krizis, ottura asiyada démokratik bir jem'iyet qurushning qanchilik qéyin bir mesile ikenlikining bir ispati hésablinidiken. Ularning éytishiche, 2005‏- yili qirghizistan esqer aqayif hakimiyiti xelq qozghilingi netijiside gumran bolghandin kéyin, qazaqistan we özbékistandiki rehberler, qirghizistandiki xelq inqilabining tesiridin qattiq endishilen'gen idi. Ular qazaqsitan we özbékistan xelqlirining adaletlik we yaxshi bir hayat üchün qirghizistandiki inqilabni örnek élishidin qattiq chöchigen.

Lékin 2005‏- yilidiki inqilab bashlinip esqer aqayif hakimiyiti aghdurulghandin béri, qirghizistanning weziyitide ottura asiyadiki qoshna dölet xelqlirini ilhamlanduridighan birer tereqqiyat yüz bermidi. Eksiche, qirghizistan bügün'ge qeder dawamlishiwatqan siyasiy jeng we jidellerge hemde naraziliq heriketlirige sehne boldi. Qirghizistandiki weziyet, rayonning bixeterliki mesilisidimu bezi qéyinchiliqlarni keltürüp chiqarmaqta. Xewerlerge qarighanda, qirghizistan hökümiti bu dölette dawamlishiwatqan siyasiy krizis sewebidin, bolupmu qirghizistanning jenubiy rayonida radikal islam teshkilatlirining künséri küchiyiwatqan tesirining alidini élishta ajizliq qilmaqta.