Xitay terep zadi kimning amérikining prézidénti bolishini xalaydu?

En'giliye b b s radi'o téléwiziye shirkiti teripidin élan qilin'ghan "xitay terep zadi kimning amérikining prézidénti bolishini xalaydu" digen maqalining bash qismidila, mundaq diyilgen: dunyada héchqandaq dölette élip bérilghan herqandaq bir saylam, amérika prézidént saylimigha oxshash pütün alemning diqqitini qozghighan emes.

Chet'ellikler kerriyning prézidént bolushini xalaydiken

Közetküchilerning qiyaslirigha qarighanda, amérikining sirtidiki kishilerning köpinchisi démokratik partiye namzatliridin kerriyning prézidént bolishini xalaydiken. Chünki, kerriy sözide:" eger men prézidént bolup saylansam, nöwette wezipe ötüwatqan prézidént jorj bushqa oxshash, xelq'ara mesililerde öz béshimchiliq qilip, bir tereplimilik siyaset élip barmaymen " digen.

Amérika prézidénti – yer sharidiki eng hoquqluq kishi

Maqalida yene mundaq déyilgen, pütün dunya 11 - ayning 2 -küni ötküzülidighan amérika prézidént saylimini yéqindin kütmekte, bundaq bolushini tesewwur qilish anche qéyin emes, sewebi amérika pütün yer sharidiki birdin - bir qudretlik döletning biri bolush bilen birge hemde yene " dunya saqchisi" qilip wezipilendürülgen. Shunga amérikining prézidénti bolghan kishi pütün yer sharida eng hoquqluq bir kishi hésablinip, meyli dunyaning qaysi bulung pushqaqliridiki kishi bolsun, uning menpe'eti, amérika prézidénti bolghan kishi bilen munasiwetlik dep qarilidu.

" Xitay terep, zadi kimning amérikining prézidénti bolishini xalaydu? " namliq bu maqalida, hazir eng chong döletler qataridin orun alghan hemde amérikining riqabetchilerdin biri dep qaralghan xitayning , bu qétimqi saylamda kimning pérézidént saylinishini xalaydighanliqi otturigha qoyulghan,sewebi hemmige melum bolghinidek, bu mesile xitay eng köngül böliwatqan muhim mesile hisaplinidu.

Zadi kim aq sarayda wezipe tutush kérek? kerriymu we yaki bushmu? béyjing da'irlirining könglidiki bu sir, nöwette metbu'atlar érishmekchi bolghan halqiliq mesillilerning biri.

Teywen mesilisi muhim orunda turidiken

Xongkongda chiqidighan "alma géziti" de amérikidiki bir siyasiyonning qarashliri élan qilin'ghan. Uning éytishiche, amérika démokratik partiyisi tarixtin buyan soda, kishilik hoquq we démokratiye mesililirige köngül bölüp kelgen bolup, xitayning bu mesililerge tutqan pozitsiyisi nachar hisaplinidu. Eksiche, jumhuryetchiler partiyisidiki nikson, régan dewridila béyjing bilen yéqindin munasiwet ornitip, amérika - xitay munasiwitini küchlendürgen. Biraq, bushning ötken yili, teywenning hazirqi halitini özgertishige qarshi turush pozitsiyisi, béyjingge bush, chén shuybi'enni yaxshi körmeydu digen tesirni bergen. Shunga béyjing da'irliri kerriyge qarighanda bush prézidént saylansa, kelgüsi 4 yil ichide teywen mesilisini bir terep qilish asan'gha toxtaydu, dep qaraydiken.

Biraq, xitay komunist partiyisi bilen amérika jumhuryetchiler partiyisi ottursida nisbeten qoyuq dep qaralghan bu munasiwet, eng deslep," 4 - iyun" weqeside éghir derijide buzuldi we ikki terep munasiwitini mezkür weqedin kéyin tonglitip qoydi. Amma prézidént bush, 11 - séntebir weqesidin kéyin xitay bilen térrorchiliqqa qarshi hemkarliqni kücheytishni otturigha qoyup, xitayning koriye yadro qoralliridin waz kéchishini qolgha keltürüshte, xitayning intayin chong rol oynaydighanliqini tekitlidi we teywen mesilisini xelqning rayi boyiche bir terep qilish kérek digen ochuq pozitsiyide boldi.

Nispiy dostluq

"Xitay terep zadi kimning amérikining prézidént bolushini xalaydu" digen maqalining axirida, amérika - xitay munasiwiti jeryanida yüz bergen dawalghushlar amérikining qaysi partiye namzatlirining textke chiqishidin qet'iy nezer, héchqaysisi xitay terepning menggülük dosti we yaki menggülük düshmini bolmaydu digen xulase chiqirilghan.

Maqalide yene éytilishiche, xitayda hoquq tutqan ji'ang zémin we xujingtaw bolsun amérika bilen munasiwet ornatqanda aghzida bir xil, könglide bir xil oy bilen yeni türlük taktikilar bilen shamalning éghishigha béqip ish tutqan, ular hichqachan mawzédong we yaki ding shawpingdek nime oylisa shuni éytidighan yeni qarshiliqini ochuq ashkara ipadileydighan hoquqdarlarning yolini tutqan emes .