"Йәр шари характерлик террорлуқ вә хәлқара һәмкарлиқ" мавзулуқ хәлқара йиғин әнқәрәдә башланди


2008-03-11
Share

Йәр шари `характерлик террорлуқ вә хәлқара һәмкарлиқ `намлиқ илмий муһакимә йиғинниң ечилиш нутуқини түркийә армийиси баш штаби башлиқи оргенирал яшар бүйүканит қилди. RFA Photo / Erkin Tarim

Түркийә армийиси баш штаби террор билән күрәш қилиш мәркизи оюштурған "йәр шари характерлик террорлуқ вә хәлқара һәмкарлиқ" мавзулуқ илмий муһакимә йиғини әнқәрәдә рәсмий башланди. 3-Айниң 10-11-күнлири болуп, җәмий икки күн давам қилидиған бу йиғинда, террорчилиққа қарши күрәшниң усуллири, хәлқара террорлуққа қарши күрәштики еһтияҗлар вә дуч келиватқан мәсилиләр, террорниң иҗтимаий вә психологийилик тәрипи, террорчилиққа қарши күрәштә хәлқара тәшкилатларниң роли, хәлқара террорчилиққа қарши күрәшниң қануни вә башқа җәһәттики һәмкарлиқ саһәлири қатарлиқ темилар һәққидә музакирә елип берилидикән.

Бу йиғинға түркийә җумһурийити дөләт рәһбәрлири, бирләшкән дөләтләр тәшкилати вәкиллири, шималий атлантик әһди тәшкилати мәсуллири, оттура ася түркий җумһурийәтлири вә грузийә қатарлиқ дөләтләрниң армийә баш штаби башлиқлири, хитай миллий мудапиә университети истратегийә тәтқиқат мәркизи башлиқи яң йи, америка қошма штатлири потомак сиясәт тәтқиқатлири институти мудири проф. Др. Йонаһ александир , пакистан, японийә, русийә вә яврупа дөләтлиригә охшаш 80 дөләттин 690 террор мутәхәссис қатнашмақта. Бу кишиләр икки күн җәрянида юқиридики темиларда музакириләр елип баридикән.

Йәр шари `характерлик террорлуқ вә хәлқара һәмкарлиқ` намлиқ илмий муһакимә йиғинниң ечилиш нутуқини түркийә армийиси баш штаби башлиқи оргенирал яшар бүйүканит қилди. У сөзидә террорниң мәқсәт әмәс, бир мәқсәтниң васитиси икәнликини, йәр шари характерлик террорни дунядики тәңпуңсиз нопус көпийишиниң кәлтүрүп чиқириватқанлиқини, дуняда бир милярд 100 милйон кишиниң йоқсуллуқ ичидә яшаватқанлиқини, террор тәшкилатлириниң болса буниңдин пайдилинип террорчи тепиватқанлиқини деди.

У сөзидә һечқандақ бир дөләтниң башқа дөләтләр билән һәмкарлашмай туруп террорни йоқ қилалмайдиғанлиқини, әмма дуняниң һәрқайси дөләтлири террор дегән немә дегән соалға ортақ җаваб тепип чиқиши керәкликини ейтип мундақ деди: "Һечқандақ бир дөләтниң башқа дөләтләр билән һәмкарлашмай туруп, дуняниң һәрқайси җайлирида паалийәт елип бериватқан террор тәшкилатлириға қарши ялғуз муҗадилә елип беришиниң мумкин әмәслики һәммимизгә мәлум. Шуңа дуня дөләтлири террорчилиққа қарши күрәштә һәмкарлиқини күчәйтишимиз керәк. Әмма шуниму әскәртип қояйки, террор дегән немә? дегән суалға хәлқарада техи ортақ бир җаваб берилмиди, җаваби ениқ болмиған террорчилиққа қарши қандақму мувәппәқийәтлик күрәш елип барғили болиду?"

Түркийә армийиси баш штаб башлиқи оргенирал яшар бүйүканит әпәнди` йәр шари характерлик террорлуқ вә хәлқара һәмкарлиқ `мавзулуқ йиғинда қилған ечилиш нутиқида түркийиниң террорға болған көз қариши үстидә тохтилип мундақ деди: "Террорниң һәр қандиқиға қарши икәнликини ениқ ипадиләп кәлгән түркийә, район вә дуня характерлик вәзипиләрни өз үстигә елип ада қилип келиватқан бир дөләт. Шундақ болсиму , бәзи дөләтләр бизниң п к к террор тәшкилатиға қарши муҗадилимизни дегәндәк қоллап қуввәтлимәй кәлди, биз буниңға қаттиқ әпсуслинимиз. Биз йәр шари характерлик террорчилиққа қарши күрәштә актип һәмкарлашқандила мувәппәқийәтлик болалаймиз."

Һаҗәттәпә университети тарих оқутқучиси, истратегийә мутәхәссиси доктор әркин әкрәм әпәнди, бүгүнки шараитта террор дегән немә? дегән суалға ортақ изаһат беришниң қейин икәнликини , чүнки бәзи дөләтләр террорчи дегән кишиниң, бәзи милләтләр үчүн қәһриман икәнликини ейтти. Әркин әкрәм әпәнди йәнә, хитай һөкүмитиниң уйғурларни террорчи дәп көрситиватқанлиқини, әмма уйғур мәсилисиниң бир миллий дава икәнликини, террор уқуми оттуриға чиқмастин бурун бу даваниң мәвҗут икәнликини тәкитләп өтти.

Икки күн давам қилидиған бу йиғинда 80 дөләттин кәлгән 690 әтрапида террор мутәхәссиси йәр шари характерлик террорлуқ вә хәлқара һәмкарлиқ һәққидә тәйярлиған илмий мақалилирини оқуп, бу һәқтә музакириләр елип баридикән. (Әркин тарим)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт