"Yer shari xaraktérlik térrorluq we xelq'ara hemkarliq" mawzuluq xelq'ara yighin enqerede bashlandi


2008-03-11
Share

Yer shari `xaraktérlik térrorluq we xelq'ara hemkarliq `namliq ilmiy muhakime yighinning échilish nutuqini türkiye armiyisi bash shtabi bashliqi orgéniral yashar büyükanit qildi. RFA Photo / Erkin Tarim

Türkiye armiyisi bash shtabi térror bilen küresh qilish merkizi oyushturghan "yer shari xaraktérlik térrorluq we xelq'ara hemkarliq" mawzuluq ilmiy muhakime yighini enqerede resmiy bashlandi. 3-Ayning 10-11-künliri bolup, jem'iy ikki kün dawam qilidighan bu yighinda, térrorchiliqqa qarshi küreshning usulliri, xelq'ara térrorluqqa qarshi küreshtiki éhtiyajlar we duch kéliwatqan mesililer, térrorning ijtima'iy we psixologiyilik teripi, térrorchiliqqa qarshi küreshte xelq'ara teshkilatlarning roli, xelq'ara térrorchiliqqa qarshi küreshning qanuni we bashqa jehettiki hemkarliq saheliri qatarliq témilar heqqide muzakire élip bérilidiken.

Bu yighin'gha türkiye jumhuriyiti dölet rehberliri, birleshken döletler teshkilati wekilliri, shimaliy atlantik ehdi teshkilati mes'ulliri, ottura asya türkiy jumhuriyetliri we gruziye qatarliq döletlerning armiye bash shtabi bashliqliri, xitay milliy mudapi'e uniwérsitéti istratégiye tetqiqat merkizi bashliqi yang yi, amérika qoshma shtatliri potomak siyaset tetqiqatliri instituti mudiri prof. Dr. Yonah aléksandir , pakistan, yaponiye, rusiye we yawrupa döletlirige oxshash 80 dölettin 690 térror mutexessis qatnashmaqta. Bu kishiler ikki kün jeryanida yuqiridiki témilarda muzakiriler élip baridiken.

Yer shari `xaraktérlik térrorluq we xelq'ara hemkarliq` namliq ilmiy muhakime yighinning échilish nutuqini türkiye armiyisi bash shtabi bashliqi orgéniral yashar büyükanit qildi. U sözide térrorning meqset emes, bir meqsetning wasitisi ikenlikini, yer shari xaraktérlik térrorni dunyadiki tengpungsiz nopus köpiyishining keltürüp chiqiriwatqanliqini, dunyada bir milyard 100 milyon kishining yoqsulluq ichide yashawatqanliqini, térror teshkilatlirining bolsa buningdin paydilinip térrorchi tépiwatqanliqini dédi.

U sözide héchqandaq bir döletning bashqa döletler bilen hemkarlashmay turup térrorni yoq qilalmaydighanliqini, emma dunyaning herqaysi döletliri térror dégen néme dégen so'algha ortaq jawab tépip chiqishi kéreklikini éytip mundaq dédi: "Héchqandaq bir döletning bashqa döletler bilen hemkarlashmay turup, dunyaning herqaysi jaylirida pa'aliyet élip bériwatqan térror teshkilatlirigha qarshi yalghuz mujadile élip bérishining mumkin emesliki hemmimizge melum. Shunga dunya döletliri térrorchiliqqa qarshi küreshte hemkarliqini kücheytishimiz kérek. Emma shunimu eskertip qoyayki, térror dégen néme? dégen su'algha xelq'arada téxi ortaq bir jawab bérilmidi, jawabi éniq bolmighan térrorchiliqqa qarshi qandaqmu muweppeqiyetlik küresh élip barghili bolidu?"

Türkiye armiyisi bash shtab bashliqi orgéniral yashar büyükanit ependi` yer shari xaraktérlik térrorluq we xelq'ara hemkarliq `mawzuluq yighinda qilghan échilish nutiqida türkiyining térrorgha bolghan köz qarishi üstide toxtilip mundaq dédi: "Térrorning her qandiqigha qarshi ikenlikini éniq ipadilep kelgen türkiye, rayon we dunya xaraktérlik wezipilerni öz üstige élip ada qilip kéliwatqan bir dölet. Shundaq bolsimu , bezi döletler bizning p k k térror teshkilatigha qarshi mujadilimizni dégendek qollap quwwetlimey keldi, biz buninggha qattiq epsuslinimiz. Biz yer shari xaraktérlik térrorchiliqqa qarshi küreshte aktip hemkarlashqandila muweppeqiyetlik bolalaymiz."

Hajettepe uniwérsitéti tarix oqutquchisi, istratégiye mutexessisi doktor erkin ekrem ependi, bügünki shara'itta térror dégen néme? dégen su'algha ortaq izahat bérishning qéyin ikenlikini , chünki bezi döletler térrorchi dégen kishining, bezi milletler üchün qehriman ikenlikini éytti. Erkin ekrem ependi yene, xitay hökümitining Uyghurlarni térrorchi dep körsitiwatqanliqini, emma Uyghur mesilisining bir milliy dawa ikenlikini, térror uqumi otturigha chiqmastin burun bu dawaning mewjut ikenlikini tekitlep ötti.

Ikki kün dawam qilidighan bu yighinda 80 dölettin kelgen 690 etrapida térror mutexessisi yer shari xaraktérlik térrorluq we xelq'ara hemkarliq heqqide teyyarlighan ilmiy maqalilirini oqup, bu heqte muzakiriler élip baridiken. (Erkin tarim)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet