تۇركىيەدىكى ئۇيغۇر ئوقۇغۇچىلار ئەلا نەتىجە بىلەن ئوقۇش پۈتتۈردى


2007-05-10
Share

ئوقۇش پۈتتۈرگەن ئۇيغۇر ئوقۇغۇچىلار. سۈرەتنى مۇھبىرىمىز ئەركىن تارىم تەمىنلىگەن. Photo by RFA

بۈگۈن، 10-ماي كۈنى تۈركىيە مائارىپ مىنىستىرلىكىنىڭ مۇراسىم زالىدا تۈركىي جۇمھۇرىيەتلىرى ۋە تۈركىي مىللەت رايونلىرىدىن كېلىپ تۈركىيىدە ئوقۇپ، ئوقۇش پۈتتۈرگەن ئوقۇغۇچىلارغا دېپلوم بېرىش مۇراسىمى ئۆتكۈزۈلدى.

57 دۆلەت ۋە رايوندىن كەلگەن تۈركىي مىللەت ئوقۇغۇچىلىرى مەكتەپ پۈتتۈردى

مۇراسىمدا 57 دۆلەت ۋە رايوندىن كەلگەن 183 نەپەر تۈركىي مىللەت ئوقۇغۇچىسىغا دېپلوم بېرىلگەن بولۇپ، بۇلارنىڭ ئىچىدە 4 نەپەر ئۇيغۇر ئوقۇغۇچىمۇ بار. بۇ دېپلوم بېرىش مۇراسىمىغا ئوقۇغۇچىلارنىڭ ئاتا- ئانىلىرىمۇ تەكلىپ بىلەن قاتناشقان بولۇپ، بۇلارنىڭ پۈتۈن چىقىملىرى تۈركىيە مائارىپ مىنىستىرلىكى تەرىپىدىن كۆتۈرۈلگەن.

سابىق سوۋېت ئىتتىپاقى پارچىلىنىپ، تۈركىي مىللەتلەر مۇستەقىل بولغاندىن كېيىن تۈركىيە جۇمھۇرىيىتى بۇلارغا ياردەم مەقسىتى بىلەن 1992- يىلى ئوتتۇرا ئاسىيا تۈركىي جۇمھۇرىيەتلىرى ۋە مىللەتلىرىدىن ئوقۇغۇچى ئەكىلىپ يېتىشتۈرۈش پىلانىنى يولغا قويغان ئىدى.

ھازىرغىچە بولغان 15 يىل ئىچىدە 5 مۇستەقىل تۈركىي جۇمھۇرىيەت ۋە 57 دۆلەتتە ياشاۋاتقان تۈركىي مىللەتلەردىن بولۇپ جەمئىي 56 مىڭ ئوقۇغۇچى ئوقۇش ئۈچۈن تۈركىيەگە كەلگەن بولۇپ، بۇلارنىڭ 6500 نەپىرى ئوقۇش پۈتتۈرگەن. 6450 نەپىرى بولسا ھازىر تۇركىيەدىكى ھەرقايسى ئۇنىۋېرسىتىتلاردا ئوقۇماقتا ئىكەن. قالغان ئوقۇغۇچىلار بولسا تۈرلۈك سەۋەپلەر بىلەن ئوقۇشنىداۋام قىلماي تۈركىيىدىن ئايرىلغان ئىكەن.

تۈركىيە مائارىپ مىنىستىرى ھۈسەيىن چېلىك ئەپەندىمنىڭ سۆزى

ئوقۇش پۈتتۈرگەن ئۇيغۇر ئوقۇغۇچىلار. سۈرەتنى مۇھبىرىمىز ئەركىن تارىم تەمىنلىگەن. Photo by RFA

16 - نۆۋەتلىكى بولغان بۇ دېپلوم تارقىتىش مۇراسىمنىڭ ئېچىلىش نۇتقىنى تۈركىيە مائارىپ مىنىستىرى ھۈسەيىن چېلىك ئەپەندىم قىلدى، ئۇ مۇنداق دېدى: "ھۆرمەتلىك ئوقۇتقۇچىلار، سۆيۈملۈك ئوقۇغۇچىلار، قەدىرلىك ئاتا-ئانىلار. ئەنئەنىۋىلىشىشكە باشلىغان تۈرك دۇنياسى دېپلوم بېرىش مۇراسىمىدا سىلەر بىلەن بىللە بولغانلىقىمدىن ئىنتايىن خۇشالمەن. ھەممىڭلار خوش كەپسىلەر. بۈگۈن بۇ مۇراسىمىمىزغا قېرىنداش دۆلەتلەردىن ئەزەربەيجان، قىرغىزىستان، قازاقىستان، ئۆزبېكىستان شۇنداقلا خىتايدا ياشاۋاتقان ئۇيغۇرلار، ئىراندىكى ئەزەرىلەردىن بولۇپ 57 دۆلەت ۋە رايوندىن كەلگەن تۈركىي مىللەتنىڭ ئوقۇغۇچىلىرى ۋە ئۇلارنىڭ ئاتا ئانىلىرى قاتناشماقتا. ئۇلار بالىلىرىنىڭ خۇشاللىقى بىلەن ئورتاقلىشىش ئۈچۈن تۈركىيەگە كەلدى. ھەممىڭلارنى تەبرىكلەيمەن. بىز سوۋېت ئىتتىپاقى يىمىرىلىپ قېرىنداشلىرىمىز مۇستەقىل بولغاندىن كېيىن ئۇلارنىڭ دۆلەتلىرىنى تۇنجى بولۇپ تونۇدۇق، تونۇش بىلەن قالمىدۇق، ئۇلارغا ياردەم قولىمىزنى ئۇزۇتۇش ئۈچۈن ئوقۇغۇچى يېتىشتۈرۈش ئىش پىلانىمىزنى يولغا قويدۇق. نۇرغۇن ئوقۇغۇچىلارنى تۈركىيەگە ئەكىلىپ ئوقۇتتۇق. ئۇلار ھازىر ئۆز دۆلەتلىرىدە يۇقىرى دەرىجىلىك ئورۇنلاردا ئىشلىمەكتە، بىز بۇلاردىن پەخىرلىنىمىز. بىز بۇ ئىش پىلانىمىزنى بۇندىن كېيىنمۇ داۋاملاشتۇرىمىز."

مائارىپ مىنىسىتىرى ھۈسەيىن چېلىك سۆزىدە، ئادرىياتىك دېڭىزىدىن سەددىچىنگىچە بولغان كەڭ جۇغراپىيەدە ئورتاق تىل، ئورتاق مەدىنىيەتنى تىكلەش ئۈچۈن بۇ پىلاننى يولغا قويغانلىقىنى ۋە مۇۋاپىقىيەتلىك بولغانلىقىنى ئېيىتتى. كېيىن، بۇ يىل ئوقۇش پۈتتۈرگەن ئوقۇغۇچىلارغا سابىق مىنىستىر مەمەت ساغلام، كۆكسال توپتان ۋە ھازىرقى مىللى مائارىپ مىنىستىرى ھۈسەيىن چېلىك قاتارلىقلار دېپلوم ۋە سوۋغات بۇيۇملىرىنى تارقاتتى.

كېيىن يەنە ھەرقايسى دۆلەتلەردىن كەلگەن ئوقۇغۇچىلارنىڭ ئاتا- ئانىلىرىغىمۇ سوۋغاتلار بېرىلدى. بىز دېپلوم بېرىش مۇراسىمى جەريانىدا دېپلوم ئالغان ئوقۇغۇچى ۋە ئۇلارنىڭ ئاتا - ئانىلىرىغا مىكروفونىمىزنى ئۇزاتتۇق.

16- نۆۋەتلىك تۈرك دۇنياسى دېپلوم تارقىتىش مۇراسىمى سەنئەت نومۇرلىرىدىن كېيىن تەنتەنىلىك ھالدا ئاياغلاشتى. بۇ ئوقۇغۇچىلارنىڭ ئاتا - ئانىلىرى بىر ھەپتە تۈركىيىنىڭ مېھمىنى بولغاندىن كېيىن ئۆز دۆلەتلىرىگە قايتىشىدىكەن.(ئەركىن تارىم)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت