Amérika xelq'ara diniy erkinlik komitéti xadimi mindi laymur bilen söhbet


2005-08-12
Share

Amérika xelq'ara diniy erkinlik komitéti 19-awghust küni Uyghur élini ziyaret qilidiken.

Igilishimizche, amérika xelq'ara diniy erkinlik komitéti wekiller ömiki Uyghur élidiki ziyariti jeryanida, isma'il tiliwaldi qatarliq aptonom rayon rehberliri shuningdek munasiwetlik idare - organlarning mes'ulliri bilen körishidiken.

Bu munasiwet bilen muxbirimiz ömer qanat amérika xelq'ara diniy erkinlik komitéti xadimi mindi laymurni ziyaret qilip, bu heqte melumat igilidi.

Qanat: Hörmetlik mindi xanim, Uyghur élige qaratqan ziyaritinglar qanche kün dawamlishidu? bu sepiringlar dawamida qaysi sheherlerni ziyaret qilimaqchi?

Mindi xanim: Biz 19- awghust küni ürümchige yétip barimiz. 19- We 20 - awghust künliri ürümchide aptonom rayon rehberliri we munasiwetlik idare – organlarning mes'ulliri bilen körishimiz hemde ürümchidiki bezi meschitlerni we rabiye qadir soda sariyini ziyaret qilimiz. 21- Awghust küni qeshqerghe bérip, uyerdiki yerlik hökümet emeldarliri bilen köriship, bezi meschitlerni ziyaret qilimiz.22- Awghust küni qeshqerdin tibetning paytexti lasagha qarap yolgha chiqimiz.

Qanat: Qeshqerni ziyaret qilish ishini xitay hökümiti orunlashturdimu yaki siler telep qildinglarmu?

Mindi xanim: Biz xitay hökümtidin bu qétimqi ziyaritimiz jeryanida qeshqerge barimiz dep telep qilmiduq. Lékin xitay hökümitige qeshqerdiki bezi kishiler bilen bezi imamlar bilen körishishni xalaydighanliqimizni bildürduq. Yeni biz qeshqerge bérishni emes, qeshqerdiki bezi imamlar bilen körishishni telep qilduq we xitay hökümiti bizning bu telipimizni qobul qilip, bizni qeshqerghe élip baridighanliqini bildürdi.

Qanat: Qeshqerde xelq bilen uchrishish pilaninglar barmu ?

Mindi xanim: Hazirche bizning meqsidimiz, qeshqerdiki bezi meschitlerning imamliri bilen uchrishishtin ibaret. Qeshqerghe barghandin kéyin u yerde xelq bilenmu uchrishishni ümid qilimiz.

Qanat: Ziyaritinglar jeryanida qaysi rehberler bilen körüshmekchi, wang léchü'en bilen uchrishamsiler?

Mindi xanim: Hazirche uchrishidighan rehberler arisida wang léchü'en yuq. Lékin biz uning bilen körisheleymiz dep oylawatimiz. Emma isma'il tilwaldi bilen körishidighanliqimiz éniq.

Qanat: Igilishimizche, xitay hökümiti ötken yili silerning ürümchini ziyaret qilish telipinglarni qobul qilmighan. Bu yil ürümchigila emes, qeshqerghimu bérishinglarni qobul qilghan. Sizche buning sewebi néme?

Mindi xanim: Siz dégendek, ötken yili xitay hökümiti bizning ürümchige bérishimizgha ruxset qilmighan. Bu yil bizning qeshqernimu ziyaret qilishimizni qobul qildi. Uyghur aptonom rayonidiki munasiwetlik idare - organ mes'ulliri bilen körüshishimiz üchün shara'it hazirlidi. Sewebi néme bolushidin qet'iy nezer biz Uyghur aptonom rayonini ziyaret qilidighanliqimiz üchün nahayiti xursenmiz.

Qanat: Xewerlerge qarighanda, bu qétimqi ziyaritinglar jeryanida, Uyghur aptonom rayonluq jama'et xewpsizlik nazaritining naziri bilen körüshmekchi ikensiler. Uning bilen qaysi mesile üstide söhbet ötküzmekchi? bu heqte bir az melumat biremsiz?

Mindi xanim: Biz yéqinda chiqqan xewerlerdin Uyghur aptonom rayonluq jama'et xewpsizlik nazaritining, diniy ishlarni bashqurushta muhim rol oynawatqanliqini éniqliduq. Omumen qilip éytqanda jama'et xewpsizlik nazariti xitayning bashqa rayonliridimu diniy ishlarni bashqurushta belgilik rol oynaydu. Lékin bu idarining Uyghur aptonom rayonida oynawatqan roli bashqa rayonlargha qarighanda pütünley perqliq. Biz jama'et xewpsizlik nazaritidin, mezkur idarining Uyghur aptonom rayonidiki diniy ishlar idarisida oynawatqan roli heqqide tepsiliy melumat élip, bu melumatlarni xitayning Uyghurlargha qarita élip bériwatqan diniy siyasitini bahalashta ishlitimiz.

Qanat: Siz yuqirida éytqandek, xitay hökümiti bu yil silerning ürümchigila emes, qeshqerghimu bérishinglargha ruxset qilghan. Shundaqla ziyaritinglar jeryanida aptonom rayon rehberliri siler bilen körishishni qobul qilish bilen birge, silerning rayondiki munasiwetlik idare - organ mes'ulliri bilen körishishinglarnimu qobul qilghan. Men yuqiridiki su'alimni yene tekrarlimaqchimen. Xitay hökümitining bundaq heriket qilishining sewebi néme bolushi mumkin.

Mindi xanim: Bizmu xitay hökümitidin bu qétimqi ziyaritimiz jeryanida, ürümchide körishidighan rehberlerning tizimlikini alghinimizda heyran bolduq. Xitay hökümitining bundaq heriket qilghanliqining sewebi néme ikenlikini bizmu bilelmiduq.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet