Хитай пуқралири сиясәттин совуватамду?


2007-10-23
Share

17 ‏-Қурултай давамида, бейҗиң хәлқи арисида райи синаш елип барған, чәтәл ахбаратчилири, хитайниң дөләт ахбарат васитилири арқилиқ тәшвиқ қиливатқан сиясий қизғинлиқ билән, нормал шәһәр пуқралириниң сиясәткә қизиқиши арисида чоң пәрқ барлиқини, нормал хәлиқтә сиясәттин совуш кәйпияти шәкилләнгәнликини байқиған. Тәкшүрүш җәрянида, бу совушниң сәвәблирини хитай пуқралири һәр хил чүшәндүргән.

Хитай хәлқи мавзедуң дәвридила сиясәттин совуп кәткән

Гуйҗуда яшаватқан яң пәмилилик бир пуқраниң билдүрүшичә,, бүгүн растинла, хәлиқтә сиясәттин совуш бар, буниң сәвәби нөвәттики сиясий түзүлмидә, хитай хәлқиниң сиясәткә иштирак қилиш, һәтта пикир қатнаштуруш һәққи йоқ, шуңа хитай хәлқи өзигә мәнпәт тәгмигән бу саһәгә қизиқмайду.

Гав миңляң исимлик бир пуқраниң билдүрүшичә, хитай хәлқи мавзедуң дәвридила сиясәттин совуп кәткән; у йиллардики сәнәттин тартип иқтисадий қурулушларғичә һәммә саһәдә сиясий шуарниң йетәкчи шуар болуши болуши, хитай хәлқидә, сиясий чақириқларға қарита тоюнуш һәтта бизар болуш кәйпиятини шәкилләндүргән,, бүгүнки совуш әнә шу тоюнушниң нәтиҗиси.

Һәқ-һоқуқи билән кари болмиған хәлқниң сиясәткә қизиқиши болмайду

Саң миңсу исимлик бириниң қаришичә болса, хитай ишикни ечиветиш сияситини йолға қойғандин кейин, хитай хәлқиниң қиммәт қарашлирида бурулуш характерлик өзгириш болған; илгирики йилларда, истиқбаллиқ болуш ‏- болмаслиқни пәқәт мәнсәпкә еришип-еришмәсликила бағлап қарайдиған хитай пуқралири әмдиликтә, бәхтлик болуш йолиниң көп хиллиқини көргән вә мәнпәәтләнгән. Шуңа нөвәттә хитай пуқралириниң қиммәт қаришида, пул әң үстүн орунға игә, сиясәт муһим орунда әмәс.

Хитай зиялийлиридин лю зушең, хитай хәлқидики сиясәттин совушни йеңи һадисә әмәс дәп қарайду, у, бу совушни хитай миллий писхикисиға бағлап чүшәндүриду; у бошүн торида елан қилған мақалисидә, хитай хәлқини бир топ қойға охшитиду, башқурулушқа қолай дәп көрситиду, униң қаришичә, хитай хәлқи тарихтин буян намратлиқниң дәрдини көп тартқан, шуңа ач қалмаслиқ, өлүп қалмаслиқ қайғуси биләнла яшап кәлгән, шуңа хитай хәлқидә һәқ-һоқуқини издәш әнәниси йоқ, һәқ-һоқуқи билән кари болмиған хәлқниң сиясәткә қизиқиши болмайду дәп қарайду.

Хитай зиялийлиридин сун венгаң, мәсилә миллий писхикида әмәс, ху җинтавниң доклатида, ху җинтавниң кишилик характеридә хаслиқ йоқ, униң доклатиму өзигә охшашла зерикишлик, шуниң үчүн хитай хәлқи 17 ‏-қурултайға қизиқмайватиду дәп чүшәндүриду.

Уйғур елидики хитайлар сиясий муқимлиқни әң муһим дәп билиду

юқирида дейилгәнләр пәқәт, хитайниң ичидики бир қисим хитай пуқралириниң сиясәттин совуш кәйпияти үстидә йүргүзүлгән мулаһизиләр; ундақта, уйғур елидики хитайларниң сиясәткә болған қизиқиши қандақ?

Бу һәқтә, уйғур зиялийлиридин садиқ турсун әпәндиниң қаришичә, уйғур елидики хитайларниң сиясәткә қизиқиши һәр вақит үстүн. Бундақ болуши, уйғур елидики хитайларда көчмәнлик туйғуси бар, улар сиясий муқимлиқни әң муһим дәп билиду.

Садиқ турсун әпәндиниң қаришичә, дөләтниң қайси партийә тәрипидин қандақ башқурулуши муһим әмәс, дөләт хитай миллитиниң қолида болсила, сиясий давалғушлар болмисила улар үчүн әң яхши вәзийәт. Униң үстигә, уйғур елидики хитай аһалиси мәвҗут сиясий аппаратқа тайинип туруп мәнпәәткә еришип вә мәнпәәтини қоғдап келиватқан тәрәп. (Шөһрәт һошур)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт