"Kommunistik yashlar ittipaqi" xitaygha néme qilip bergen we néme qilip béreleydu?


2006-12-21
Share

Amérika xemilton uniwérsi'itétidiki proféssor li chéng ependining erkin asiya radi'osida élan qilghan obzorida bayan qilinishiche, xu jintaw 1980 ‏- yillarda kommunistik yashlar ittipaqi merkizi komitétining bashliqi bolghan mezgildiki 22 neper ezaning 21 i hazir ölke derijiliktin yuqiri rehberlik orun'gha belgilinip, xitaydiki 31 ölke, aptonom rayon we sheherning 18i "kommunistik yashlar ittipaqi" chilarning qoligha ötüp boldi. Hazir yene 1990 ‏- yillardiki "kommunistik yashlar ittipaqi" chilarmu rehberlik orun'gha qoyulushqa bashlidi. Buninggha qarita xitayda hazir "yashlar ittipaqi" dégen zadi qandaq teshkilat idi? u xelqning menpe'etini qoghdaydighan birer chong ishni öz aldigha wujutqa chiqirip baqtimu? emdi buningdin kéyin néme qilip béreleydu? dégen su'allar we mulahiziler kélip chiqmaqta.

Xu jintaw yüzliniwatqan dewr maw, déng, jyang dewrige tamamen oxshimisimu, emma u yenila kona yolda

Boshün tor bétide élan qilin'ghan "kommunistik yashlar ittipaqi xitaygha néme qilip béreleydu?" dégen obzorda mawzédungdin xu jintawghiche bolghan 4 dewr rehberlik qurulmisining kadirlar asasi heqqide tehlil yürgüzülgen. Uningda bayan qilinishiche, mawzédungning kadirlar asasi jeng meydanidin kelgenler, gerche ular oxshimighan terep we gurohlargha tewe bolsimu, bir-birini jan tikip yoq qilishqa tirishsimu, emma özliri qurghan "yéngi junggo" dégen döletni qoghdashta we "kommunizm" dégen nishani jehette hemmisining pikri bir idi. Déng shawpingning kadirlar asasimu mawzédunggha oxshash, emma ular "mawzédungning sinipi köresh" siyasitidin waz kéchishke alliqachan teyyar turghan bolghachqa, shunglashqa xitayda "islahat élip bérish"qa hemmsi birdek qoshulatti. Xitayda démokratiye tüzümini tikleshni közligen "tötinchi iyun weqesi"dek ammiwiy heriketni basturushtimu, ular terep sürüshtürmey hemmisi birleshti. Lékin déng shawping dewride islahattin menpetdar bolush jehette kadirlar qoshuni parchilinishqa bashlighan idi. Déng shawping bu dewrde hakimiyet béshidin chékinip, jang zéminni 3 ‏- ewlat yadro, xu jintawni 4 ‏- ewlat yadro dep aldin belgileshkimu ülgürdi. Bu dewrde chiriklishish ewj élip, kadirlar ikki qutupqa bölön'gende jyang zémin hoquq tutti. Emma bu dewrde nopuzluq déng shawping téxiche hayat turghachqa, u jyang ziminning orni muqim turush üchün hesse qoshti. Xu jintaw hoquq tutqandin kéyin, yüzliniwatqan dewr maw, déng, jyang dewrige tamamen oxshimisimu, emma u yenila kona yolda kétiwatidu.

Xu jintaw ning kadirlar asasi "kommunistik yashlar ittipaqi"chilar

Mekur maqalide bayan qilinishiche, xu jintaw 4 ‏- ewlat yadro süpitide hoquq tutushqa bashlighanda, xu jintawning kadirlar asasi, xuddi xemilton uniwérisitétidiki proféssor li chéng ependi éytqandek, a'ilidin mektepke, mekteptin idarigha , idaridin chong emeldarliqqa belgilen'gen "kommunistik yashlar ittipaqi"chilardinla ibaret boldi. Emma bu dewrde xitayda weziyet alliqachan özgergen idi. Uning ornini qoghdap béridighan déng shawping yoq, jyang zémnining yardem bérelishimu allqachan cheklik, xu jintawning xitaydiki partiye, hökümet, herbiy hoquqlarning hemmisge bolghan "yadro"liqigha qarita herxil namelum riqabet mewjut idi. Belki yerlik emeldarlarning imtiyazi alliqachan chongiyip ketken.

"Kommunistik yashlar ittipaqi"ning musteqil neziriyisi yoq

Mezkur maqalide "kommunistik yashlar ittipaqi"chilar heqqide tehlil qilinishiche, birinchidin, xitayda "kommunistik yashlar ittipaqi"chilarning musteqil neziriyisi yoq, u peqet xitay kommunistik partiyisining yardemchisi. Uning burchi meyli xata bolsun, yaki toghra bolsun, kommunistik partiye buyrughannila qilish, mesilen, "medeniyet inqilabi" dégen herikette maw zédung kimge egesh dése shuninggha egeshken, kimni tut dése, shuni sewebsiz tutup, urup, bulap, talap, hetta öltürgenlermu shularghu. Xu jintawning hazirqi kadirlar asasi eyni waqittiki özige oxshaydighan mushundaq "yashlar ". "Kommunistik yashlar ittipaqi"chilarning mesililerni musteqil birterep qilish qabiliyiti yoq

Ikkinchidin, "kommunistik yashlar ittipaqi"chilarning mesililerni musteqil birterep qilish qabiliyiti yoq. Bir bashliq kélidu, uni qarshi élinglar dése, ular ösmürlerni teshkillep kochilargha chong lozunka kötürüp chiqish, chawak chélishnila bilidu. 1989 ‏- Yilidiki 4 ‏- iyun weqeside "kommunistik yashlar ittipaqi" palej bolup qalmighanmidi? jang zémin dewride "yashlar"ning tosattin kochilargha chiqip, amérika elchixanisigha kések atqanliqi, kéyin yene tosattin yaponiyige qarshi namayish qilghanliqi qatarliq weqelerdin hetta "kommunistik yashlar ittipaqi"ning peqet xewiri bolmighan idighu.

"Kommunistik yashlar ittipaqi" organ gézitini bashqa terepler toxtitiwetse néme qilalidi?

Üchinchidin, xitayda "kommunistik yashlar ittipaqi"ning organ géziti bolghan "junggo yashliri"ning shöbisi "muz noqtisi" dégen gézitni bashqa terepler buyruq chiqirip toxtitiwetkende, "kommunistik yashlar ittipaqi" özi héchnéme qilalmay qarap turmidimu? mushundaq teshkilat buningdin kéyin xitaygha néme qilip béreleydu?

Nur bekrimu "kommunistik yashlar ittipaqichilar"ning biri

Uyghurlarning arisidiki inkaslargha asaslan'ghanda, gerche xu jintaw Uyghur aptonom rayon'ghimu "kommunistik yashlar ittipaqi"chilarni belgilewatqan bolsimu, emma wang léchu'endek emeldarlar yenila 3 ‏- qétim dawamliq hoquq tutidighan qanunsizliqni özgerteligini yoq. Xuddi nur bekridek "ton'ganlarning öz ana tili yoq, ularmu bir millet, emdi Uyghurlarning öz tili bolmisa néme bolidiken?" dégendek mentiqisi buzulghan, qanunsiz gep qilidighan mu'awin shujimu "kommunistik yashlar ittipaqichilar"ning birighu. (Weli)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet