Хитай һөкүмити йезиларни тәрәққи қилдуруш һәққидә йеңи пилан түзди

• Мухбиримиз меһрибанниң бу һәқтики мәлумати
• Download story audio

Хитайда ечиливатқан 10 ‏- нөвәтлик мәмликәтлик хәлқ қурултийи җәрянида, йәни чаршәнбә күни хитайниң һәрқайси өлкилиридики йезиларни тәрәққи қилдуруш мәсилиси һәққидә мәхсус ахбарат елан қилиш йиғини ечилди һәмдә бу һәқтә бир йүрүш йеза тәрәққиятиға мунасивәтлик йеңи сиясәтләр оттуриға қоюлди.

Мәзкур йиғинға қатнашқан мухбирлар йезиларда мәвҗут болуп туриватқан, деһқанларниң өз йеридин айрилип қилиш мәсилиси һәққидә тәкрар соалларни оттуриға қойғанда, йеза игилик министерлиқиниң муавин министири йи чинҗе йәр мәсилисиниң деһқанлар үчүн һәқиқәтән наһайити еғир бир мәсилигә айланғанлиқиға һәмдә йилиға аз дегәндә 1 милйон деһқанниң өз йеридин айрилип қеливатқанлиқиға иқрар болған. Хитай дөләт тәрәққият вә ислаһат комитетиниң муавин мудири ду йин " деһқанларниң йерини әрзан баһада сетивелишниң өзи деһқанларниң мәнпәәтигә зиянкәшлик қилғанлиқ. Һазир бу хил әһвал һәқиқәтән еғир. Шуңа бу һәқтә чоқум ислаһат елип беришимиз керәк " дәп билдүрди.

Хитай һөкүмити бу қетимқи хәлқ қурултийида, мәмликәт бойичә деһқанчилиқ беҗини пүтүнләй бикар қилидиғанлиқини, 2007 - йилиға қәдәр йезилар мәҗбури маарипида, омумйүзлүк һалда оқуш пули вә китаб пули қатарлиқларни бикар қилидиғанлиқини һәмдә 2008 - йилиға барғанда, йезиларда һәмкарлишип давалаш түзүмини омумйүзлүк иҗра қилидиғанлиқини җакарлиған.

Бейҗиңда ечиливатқан мәмликәтлик 10 ‏- нөвәтлик хәлқ қурултийиға қатнашқан уйғур аптоном райониниң компартийә баш секретари ваң лечүән бундин кейинки 11 ‏- бәш йиллиқ пилан мәзгилидә, уйғур елидә йезиларни тәрәққи қилдуруш хизмитини әң асасий орунға қойидиғанлиқини һәмдә һөкүмәтниң йеңи сияситигә әгишип, пурсәттин пайдилинип, барлиқ күч билән уйғур йезилирини тәрәққи қилдуридиғанлиқини билдүрди.

Бу мунасивәт билән, америка уйғур бирләшмисиниң баш катипи алим сейитоф әпәнди вә америкида турушлуқ уйғур зиялийси сидиқ һаҗи рози әпәнди зияритимизни қобул қилип, өзлириниң бу һәқтики қарашлирини оттуриға қойди.