Xitay hökümiti yézilarni tereqqi qildurush heqqide yéngi pilan tüzdi


2006-03-09
Share

Xitayda échiliwatqan 10 ‏- nöwetlik memliketlik xelq qurultiyi jeryanida, yeni charshenbe küni xitayning herqaysi ölkiliridiki yézilarni tereqqi qildurush mesilisi heqqide mexsus axbarat élan qilish yighini échildi hemde bu heqte bir yürüsh yéza tereqqiyatigha munasiwetlik yéngi siyasetler otturigha qoyuldi.

Mezkur yighin'gha qatnashqan muxbirlar yézilarda mewjut bolup turiwatqan, déhqanlarning öz yéridin ayrilip qilish mesilisi heqqide tekrar so'allarni otturigha qoyghanda, yéza igilik ministérliqining mu'awin ministiri yi chinjé yer mesilisining déhqanlar üchün heqiqeten nahayiti éghir bir mesilige aylan'ghanliqigha hemde yiligha az dégende 1 milyon déhqanning öz yéridin ayrilip qéliwatqanliqigha iqrar bolghan. Xitay dölet tereqqiyat we islahat komitétining mu'awin mudiri du yin " déhqanlarning yérini erzan bahada sétiwélishning özi déhqanlarning menpe'etige ziyankeshlik qilghanliq. Hazir bu xil ehwal heqiqeten éghir. Shunga bu heqte choqum islahat élip bérishimiz kérek " dep bildürdi.

Xitay hökümiti bu qétimqi xelq qurultiyida, memliket boyiche déhqanchiliq béjini pütünley bikar qilidighanliqini, 2007 - yiligha qeder yézilar mejburi ma'aripida, omumyüzlük halda oqush puli we kitab puli qatarliqlarni bikar qilidighanliqini hemde 2008 - yiligha barghanda, yézilarda hemkarliship dawalash tüzümini omumyüzlük ijra qilidighanliqini jakarlighan.

Béyjingda échiliwatqan memliketlik 10 ‏- nöwetlik xelq qurultiyigha qatnashqan Uyghur aptonom rayonining kompartiye bash sékrétari wang léchüen bundin kéyinki 11 ‏- besh yilliq pilan mezgilide, Uyghur élide yézilarni tereqqi qildurush xizmitini eng asasiy orun'gha qoyidighanliqini hemde hökümetning yéngi siyasitige egiship, pursettin paydilinip, barliq küch bilen Uyghur yézilirini tereqqi qilduridighanliqini bildürdi.

Bu munasiwet bilen, amérika Uyghur birleshmisining bash katipi alim séyitof ependi we amérikida turushluq Uyghur ziyaliysi sidiq haji rozi ependi ziyaritimizni qobul qilip, özlirining bu heqtiki qarashlirini otturigha qoydi.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet