خىتاي دائىرىلىرى دالاي لاما ۋەكىللىرى بىلەن شىۋىتسارىيىدە ئۇچراشتى
2005.07.01
خىتاي دائىرىلىرىنىڭ تىبەت روھانى داھىسى دالاي لاما ۋەكىللىرى بىلەن شىۋىتسارىيىدە ئېلىپ بارغان ئىككى كۈنلۈك سۆھبىتى جۈمە كۈنى ئاخىرلاشتى. بۇ خىتايلارنىڭ تىبەت ۋەكىللىرى بىلەن تۇنجى قېتىم خىتاي زېمىنى سىرتىدا سۆھبەت ئېلىپ بېرىشى بولۇپ ھېسابلىنىدۇ.
دارامسالادىكى دالاي لاما ئىشخانىسىنىڭ ئاشكارىلىشىچە، بۇ قېتىمقى سۆھبەت ئۈز - ئارا ئۇچرىشىش باسقۇچىدىكى خىتاي - تىبەت سۆھبىتىنىڭ بىر قىسىمى بولۇپ، سۆھبەتكە تىبەت تەرەپتىن بەش نەپەر ۋەكىل ئىشتىراك قىلغان.
دالاي لاما بىلەن بېيجىڭ دائىرىلىرى ئوتتۇرىسىدىكى سۆھبەت 1993 - يىلى ئۈزۈلۈپ قالغاندىن كېيىن، 2002 - يىلى قايتىدىن ئەسلىگە كەلدى. شۇنىڭدىن بېرى ئىككى تەرەپ ھازىرغا قەدەر تۆت قېتىم ئۇچرىشىپ، چەتئەلدىكى تىبەت سەرگەردانلىرىنىڭ يۇرتىغا قايتىش ۋە تىبەتكە يۇقىرى دەرىجىلىك ئاپتونومىيە بېرىش مەسىلىسىنى مۇزاكىرە قىلماقتا.
دالاي لاما ئىشخانىسىنىڭ باياناتىدا تەكىتلىشىچە، بەش كىشىلىك تىبەت ۋەكىللەر ئۆمىكىگە دالاي لامانىڭ ئامېرىكىدا تۇرۇشلۇق ۋەكىلى لودى گيارى بىلەن ياۋروپا ئىتتىپاقىدىكى ۋەكىلى كېلساڭ گيالتسىن يىتەكچىلىك قىلغان. ھەر ئىككىلا تەرەپ سۆھبەت مەزمۇنىنى مەخپىي تۇتتى.
بۇنىڭدىن ئىلگىرىكى ئۈچ قېتىملىق سۆھبەت بېيجىڭدا ئۆتكۈزۈلگەن. دالاي لاما ئىشخانىسىنىڭ باياناتىدا، "دالاي لاما بۇ ئۇچرۇشۇشلارنىڭ تىبەت مەسىلىسىنى ھەل قىلىش يولىدىكى رەسمى سۆھبەتكە تەرەققىي قىلىشىنى ئۈمىد قىلىدۇ،" دەپ تەكىتلىگەن.
مۇناسىۋەتلىك ماقالىلار
- دالاي لاما، دېموكراتىك ۋە ئەركىن تىبەتنىڭ روھانى داھىغا ئىھتىياجى قالمايدىغانلىقىنى بىلدۈردى
- ۋۇ باڭگو، يېڭى زېلاندىيە پارلامېنتىدا تىبەت پائالىيەتچىسىنىڭ قارشىلىق ھەرىكىتىگە دۈچ كەلدى
- دالاي لاما ئەلچىلىرى پات ئارىدا خىتاينى زىيارەت قىلىشنى كۈتمەكتە
- دالاي لاما تەيىنلىگەن بەنچەن لامانىڭ ئىز- دېرىكى ھازىرغا قەدەر مەلۇم ئەمەسكەن
- دالاي لاما، ياپونىيىدىكى زىيارىتى داۋامىدا ئالىي ئاپتونومىيىگە ئېرىشىش ئارزۇسىنى نامايەن قىلدى