Xitay da'iriliri dalay lama wekilliri bilen shiwitsariyide uchrashti

Xitay da'irilirining tibet rohani dahisi dalay lama wekilliri bilen shiwitsariyide élip barghan ikki künlük söhbiti jüme küni axirlashti. Bu xitaylarning tibet wekilliri bilen tunji qétim xitay zémini sirtida söhbet élip bérishi bolup hésablinidu.

Daramsaladiki dalay lama ishxanisining ashkarilishiche, bu qétimqi söhbet üz - ara uchrishish basquchidiki xitay - tibet söhbitining bir qisimi bolup, söhbetke tibet tereptin besh neper wekil ishtirak qilghan.

Dalay lama bilen béyjing da'iriliri otturisidiki söhbet 1993 - yili üzülüp qalghandin kéyin, 2002 - yili qaytidin eslige keldi. Shuningdin béri ikki terep hazirgha qeder töt qétim uchriship, chet'eldiki tibet sergerdanlirining yurtigha qaytish we tibetke yuqiri derijilik aptonomiye bérish mesilisini muzakire qilmaqta.

Dalay lama ishxanisining bayanatida tekitlishiche, besh kishilik tibet wekiller ömikige dalay lamaning amérikida turushluq wekili lodi gyari bilen yawropa ittipaqidiki wekili kélsang gyaltsin yitekchilik qilghan. Her ikkila terep söhbet mezmunini mexpiy tutti.

Buningdin ilgiriki üch qétimliq söhbet béyjingda ötküzülgen. Dalay lama ishxanisining bayanatida, "dalay lama bu uchrushushlarning tibet mesilisini hel qilish yolidiki resmi söhbetke tereqqiy qilishini ümid qilidu," dep tekitligen.