Икки нәпәр тибәтлик әмәлдар мәктәптә йүз бәргән қатиллиқ вәқәсидә өлди

• Аңлаш
• Download story audio

9 ‏- Айниң 27 ‏- күни әтигәндә, хитайниң гәнсу өлкисидики миллий пидагогика институтида адәм етип өлтүрүш вәқәси йүз бәрди. Йәни гәнсу миллий пидагогика институтиниң мудири ло бозаң мәзкур мәктәпниң партком секритари яң зихуңни етип өлтүрүп, кәйнидин өзигә оқ чиқирип өлгән.

Вәқәниң сәвәби техи ениқ әмәс

Гәнсу өлкисидики миллий пидагогика институтида йүз бәргән бу қанлиқ вәқәдә өлгән мәктәп мудири билән мәктәп партком секритари иккилиси тибәтлик болуп, вәқә йүз бериштики һәқиқий сәвәб техи ашкариланмиған.

Хоңкуң “ шиңдав гезити” дә берилгән хәвәрдә ейтилишичә, гәрчә гәнсу өлкиси миллий пидагогика институтида йүз бәргән бу қанлиқ вәқә хитай маарип министирлиқи, дөләт миллий ишлар комитети вә гәнсу өлкисиниң юқири қатламлирини қаттиқ чөчүткән болсиму, һөкүмәт даирилири мәмликәт ичидики мәтбуат орунлири вә мухбирларниң бу һәқтә мәлумат беришини қаттиқ чәклимәктә. Хоңкуң “ шиңдав гезити” дә берилгән бу һәқтики мәлуматта ейтилишичә, гәнсу өлкиси миллий пидагогика институти 9 ‏- айниң 27 ‏- күнидики қанлиқ вәқәдә мәктәп мудири ло бузаң тәрипидин етип өлтүрүлгән мәзкур мәктәпниң партком секритари яң зихуң үчүн йеқинда йошурун матәм мурасими өткүзгән. Лекин һөкүмәт мәзкур матәм мурасими һәққидиму тәпсилий хәвәр беришни чәклигән.

Вәқәниң тәпсилати

Хоңкуң шиңдав гезитидә берилгән мәлуматта көрситилишичә,27 ‏- сентәбир күни әттигәндә, гәнсу миллий пидагогика институтиниң мудири лобусаң мәзкур мәктәп партком секритариниң ишханисиға бөсүп кирип, яңниң каллисиға оқ чиқирип, уни нәқ мәйдандила өлтүргән һәмдә шуниң билән бир вақитта өзигиму оқ чиқарған. Лекин лу бусаң нәқ мәйданда өлмигән. У дохтурханиға апирилғандин кейин андин җан өзгән .

Мәзкур мәлуматта ейтилишичә, һазир вәқә йүз бәргән гәнсу өлкиси миллий пидагогика институти сақчилар тәрипидин пүтүнләй қамал қилинған һәмдә " вәқә ениқлиништин бурун, мәктәп ичидики учурниң сиртқа тарқилип кетишидин сақлиниш керәк" дәп буйруқ чүшүрүлгән. Шундақтиму исмини вә авазини мәлум қилишни халимиған мәзкур мәктәп оқуғучилири " мәктәп мудиримизниң партком секритарини өлтүрүвитишни пәқәтла ойлап йетәлмидуқ . Бу қетим йүз бәргән вәқә мәзкур мәктәп қурулғандин буянқи әң қорқунчлуқ вәқә болуп һесаблиниду " дәп билдүргән. Радиомизниң тибәт бөлүми мухбирлириниң зияритини қобул қилған , исмини мәлум қилишни халимиған йәрлик тибәт пуқраси өзиниң бу иккила башлиқни тонуйдиғанлиқини билдүрди.

Өлгичиләрниң һәр иккиси тибәт миллитидин

Ө сөзидә,мәктәп мудири лобусаң билән партком секритари яң зихуң иккилиси тибәт миллити болуп, улар 50 яшлар әтрапида икән. Лобусаң болса профессор унваниға еришкән компартийә әзаси икән. У 1994 ‏- йили мәзкур мәктәпниң муавин мудири болуп, 2001 ‏- йили мудирлиққа сайланған икән . яң зихуң болса илгири наһийә башлиқи болуп, кейин маарип идарисиниң башлиқи вә муавин өлкә башлиқи, өлкилик партком муавин секритари болуп ишлигән икән .

Америкида нәшр қилинидиған “ улуғ ера ” гезитидә берилгән бу һәқтики мәлуматларда ейтилишичә, яң зихуң гәнсу өлкиси миллий пидагогика институтиниң партком секритари болуп ишлигәндин буян, мәзкур мәктәп ичидә түрлүк рәткә селиш паалийәтлирини елип барған. Бу җәрянда, мәзкур мәктәп мудири лобусаң чәткә қеқилип, нурғун сүркүлүшләр йүз бәргән. Бәзиләрниң инкас қилишичә, мәктәп мудири лобусаң иқтисади мәсилиләр түпәйлидин яңниң еғир бисимиға дүч кәлгәникән . “ улуқ ера ” гезитидә берилгән мәлуматта йәнә, вәқә йүз бериштин илгири юқири дәриҗилик һөкүмәт орунлириниң мәктәп мудири лу босаңни ләнҗу шәһиригә йөткәш қарари чүшүрүлгән икән.