Ikki neper tibetlik emeldar mektepte yüz bergen qatilliq weqeside öldi

• Anglash
• Download story audio

9 ‏- Ayning 27 ‏- küni etigende, xitayning gensu ölkisidiki milliy pidagogika institutida adem étip öltürüsh weqesi yüz berdi. Yeni gensu milliy pidagogika institutining mudiri lo bozang mezkur mektepning partkom sékritari yang zixungni étip öltürüp, keynidin özige oq chiqirip ölgen.

Weqening sewebi téxi éniq emes

Gensu ölkisidiki milliy pidagogika institutida yüz bergen bu qanliq weqede ölgen mektep mudiri bilen mektep partkom sékritari ikkilisi tibetlik bolup, weqe yüz bérishtiki heqiqiy seweb téxi ashkarilanmighan.

Xongkung “ Shingdaw géziti” de bérilgen xewerde éytilishiche, gerche gensu ölkisi milliy pidagogika institutida yüz bergen bu qanliq weqe xitay ma'arip ministirliqi, dölet milliy ishlar komitéti we gensu ölkisining yuqiri qatlamlirini qattiq chöchütken bolsimu, hökümet da'iriliri memliket ichidiki metbu'at orunliri we muxbirlarning bu heqte melumat bérishini qattiq cheklimekte. Xongkung “ Shingdaw géziti” de bérilgen bu heqtiki melumatta éytilishiche, gensu ölkisi milliy pidagogika instituti 9 ‏- ayning 27 ‏- künidiki qanliq weqede mektep mudiri lo buzang teripidin étip öltürülgen mezkur mektepning partkom sékritari yang zixung üchün yéqinda yoshurun matem murasimi ötküzgen. Lékin hökümet mezkur matem murasimi heqqidimu tepsiliy xewer bérishni chekligen.

Weqening tepsilati

Xongkung shingdaw gézitide bérilgen melumatta körsitilishiche,27 ‏- séntebir küni ettigende, gensu milliy pidagogika institutining mudiri lobusang mezkur mektep partkom sékritarining ishxanisigha bösüp kirip, yangning kallisigha oq chiqirip, uni neq meydandila öltürgen hemde shuning bilen bir waqitta özigimu oq chiqarghan. Lékin lu busang neq meydanda ölmigen. U doxturxanigha apirilghandin kéyin andin jan özgen .

Mezkur melumatta éytilishiche, hazir weqe yüz bergen gensu ölkisi milliy pidagogika instituti saqchilar teripidin pütünley qamal qilin'ghan hemde " weqe éniqlinishtin burun, mektep ichidiki uchurning sirtqa tarqilip kétishidin saqlinish kérek" dep buyruq chüshürülgen. Shundaqtimu ismini we awazini melum qilishni xalimighan mezkur mektep oqughuchiliri " mektep mudirimizning partkom sékritarini öltürüwitishni peqetla oylap yételmiduq . Bu qétim yüz bergen weqe mezkur mektep qurulghandin buyanqi eng qorqunchluq weqe bolup hésablinidu " dep bildürgen. Radi'omizning tibet bölümi muxbirlirining ziyaritini qobul qilghan , ismini melum qilishni xalimighan yerlik tibet puqrasi özining bu ikkila bashliqni tonuydighanliqini bildürdi.

Ölgichilerning her ikkisi tibet millitidin

Ö sözide,mektep mudiri lobusang bilen partkom sékritari yang zixung ikkilisi tibet milliti bolup, ular 50 yashlar etrapida iken. Lobusang bolsa proféssor unwanigha érishken kompartiye ezasi iken. U 1994 ‏- yili mezkur mektepning mu'awin mudiri bolup, 2001 ‏- yili mudirliqqa saylan'ghan iken . Yang zixung bolsa ilgiri nahiye bashliqi bolup, kéyin ma'arip idarisining bashliqi we mu'awin ölke bashliqi, ölkilik partkom mu'awin sékritari bolup ishligen iken .

Amérikida neshr qilinidighan “ Ulugh éra ” gézitide bérilgen bu heqtiki melumatlarda éytilishiche, yang zixung gensu ölkisi milliy pidagogika institutining partkom sékritari bolup ishligendin buyan, mezkur mektep ichide türlük retke sélish pa'aliyetlirini élip barghan. Bu jeryanda, mezkur mektep mudiri lobusang chetke qéqilip, nurghun sürkülüshler yüz bergen. Bezilerning inkas qilishiche, mektep mudiri lobusang iqtisadi mesililer tüpeylidin yangning éghir bisimigha düch kelgeniken . “ Uluq éra ” gézitide bérilgen melumatta yene, weqe yüz bérishtin ilgiri yuqiri derijilik hökümet orunlirining mektep mudiri lu bosangni lenju shehirige yötkesh qarari chüshürülgen iken.