Dalay lama tibet xelq qozghilingining 46 yilliqini xatirilidi

Tibetning diniy dahiysi dalay lama peyshenbe küni, tibette iqtisad tereqqi qiliwatqan bir peytte, kishilik hoquqni depsende qilish, diniy erkinlikni cheklesh we tibetning aptonomiyisige dexli- teruz yetküzüshtek ehwallarning mewjütlikini bildürdi.

U bu sözni " tibet xelq qozghilingi" yüz bergenlikining 46 yilliqi munasiwiti bilen ötküzülgen xatirilesh murasimida éytqan. Emma u yene tibetning musteqilliqini istimeydighanliqini qayta tekitlidi.

U sözide, "tibet aptonum rayoni qurulghandin buyan, tibetning heqiqiy hoquqi xitay rehberlirining qolida bolup, tibetler barghansiri her xil cheklime we chetke qéqilishqa uchirawatidu. Tibette hazir kem boliwatqini, öz-ara ishench asasidiki milliy barawerlik we heqiqiy muqimliq" dédi. U yene, tibetning xitay térritoriyisde qélishini xalaydighanliqini körsetti.

46 Yil awalqi 10 - mart küni, tibette xitay hökümitige qarshi qoralliq qozghilang kötürülgen bolup, xitay hökümiti uni " tibet topilingi" dep ataydu. U qétimqi qozghilang basturulghandin kiyin, dalay lama hindistan'gha qéchip bérip, tibet sürgündiki hökümitini qurghan.

Tibetning diniy dahisi dalay lama gerche tibetning musteqilliqini telep qilmaydighanliqini bildürüp kelgen bolsimu, emma xitay hökümiti uni " bölgünchi" dep qarimaqta. (Arzu)