Dalay lama elchiliri pat arida xitayni ziyaret qilishni kütmekte

Tibetning diniy dahisi dalay lamaning elchisi lodi gerining charshenbe küni ashkarilishiche, dalay lamaning bir wekiller ömiki pat arida xitayni ziyaret qilip, tibet mesilisini hel qilish layihisi heqqide söhbet ötküzidiken.

Lodi gerining amérika awazi radi'osigha bildürüshiche, u xitay bilen ötküzidighan bu söhbettin intayin ümidwar iken. Uning tekitlishiche, dalay lama nöwette xitay xelq jumhuriyitining ramkisi ichide tibet mesilisini hel qilish yolini izdimekte.

Bu qétimqi ziyaret, xitay hökümiti bilen dalay lama arisidiki alaqe 2002 - yili qayta bashlan'ghandin buyan, dalay lama elchilirining tötinchi qétim xitaygha bérishi bolup hisablinidiken.

Lodi geri, xitay bilen tibet mesilisining intayin murekkep ikenlikini, qisqa waqit ichide hel qilish imkaniyitining yoqliqini bildürdi. U yene, xitay bilen hindistan munasiwitining yaxshilinishimu tibet xelqige paydiliq ikenlikini körsetti.

Tibetning diniy dahisi dalay lama nöwette hindistanda sürgünde yashimaqta. U gerche tibetning musteqilliqini istimeydighanliqini, peqet aliy aptonomiye telep qilidighanliqini bildürgen bolsimu, biraq xitay hökümiti uni " bölgünchi" dep eyiblep kelmekte. (Arzu)