Amérika dölet mejlisi dalay lamagha altun médali bérish herikiti bashlandi

Amérika dölet mejlisining ezaliri, tibetning diniy we siyasiy dahiysi dalay lamani, amérika dölet mejlisining eng aliy nishani bolghan, dölet mejlisi altun médali bilen makapatlash herikitini bashliwetti.

Dalay lamagha dölet mejlisi altun médali bérish herikitining teshebbuschiliri teripidin, dölet mejlisi ezalirigha mezkur heriketni qollash toghrisida ewetilgen bir xette, médalning dalay lamaning tinchliq, kishilik hoquq we diniy chüshinishni qanat yaydurush toghrisida körsetken pewqul'adde xizmetliri üchün bérilidighanliqi bildürülgen. Amérika dölet mejlisi altun médali, qehrimanlargha, aliy jasaret körsetkenlerge hemde diniy rehberlerge bérilidiken.

Hazirghiche, amérika dölet mejlisi rim papasi, papa 2‏- jan pol, tirisa anan, nobil tinchliq mukapati alghan eli wezel we jenubiy afriqining rehbiri nilson mandila qatarliq ataqliq kishilerni dölet mejlisi altun médali bilen mukapatlighan.

Dalay lamani dölet mejlisi altun médali bilen mukapatlash herikitining teshebbuschilirining éytishiche, dalay lamagha dölet mejlisi altun médali bérish qanun layihisining qobul qilinishi, amérika dölet mejlisining tibet mesilisining tibet medeniyitini qoghdighan we tibet xelqining aptonomiye teleplirige hörmet qilghan asasta, söhbet yoli bilen bir terep qilinishini qollaydighanliqi toghrisidiki küchlük bir signali hésablinidiken.

Dalay lamagha dölet mejlisi altun médalining bérilishi üchün, amérika dölet mejlisi ezalirining az dégende yérimining bu toghridiki qanun layihisini qobul qilishi kérek iken.

Xewerlerge qarighanda, amérika dölet mejlisi xelq'ara munasiwetler komitétining nopuzluq ezaliridin tam lantos ependi, dalay lamagha dölet mejlisi altun médalni bérish herikitini qollawatqan siyasetchilerning béri iken. (Qanat)