Dalay lama xitayni ziyaret qilishni arzu qilidu

Tibet rohani dahiysi dalay lama jüme küni daramsalada 1959 ‏- yildiki tibet qozghilingini xatirilesh murasimida söz qilip, xitaydiki meshhur budda tawabgahlirini ziyaret qilish ümidi barliqini bildürdi. Dalay lamaning eskertishiche, uning yéqinda xitayni ziyaret qilip qaytqan wekilliri dalay lamaning bu arzusini xitay hökümitige uqturghan.

U, " méning wekillirim xitaygha bérip tawab qilish arzuyumni ulargha yetküzdi " deydu. Uning tekitlishiche, xitayda buddizimning uzun tarixigha ige dölet bolush süpitide tawab qilidighan nurghun yerler bar " iken. Bu dalay lamaning tunji qétim xitaydiki budda tawabgahlirini ziyaret qilish telipini ashkara tilgha élishi bolup hésablinidu.

Birleshme axbarat agéntliqining xewer qilishiche, xitay tashqi ishlarministirliqining bayanatchisi dalay lamaning ziyaret telipige derhal jawab qayturmighan. Dalay lama murasimda tibetlerning aliy aptonomiye telipini " memliket ichi we sirtidiki tibetlerning hayatliq yolidiki qanun'gha uyghun, adil we muwapiq telep " dep körsetti.

Xitay hökümiti bu yil 2 - ayda dalay lamaning lodi gyari qatarliq wekilliri bilen béyjingda tibet mesilisi boyiche söhbet élip barghan. Gerche her ikkila terep söhbetning mezmunini ashkarilimighan bolsimu, biraq tibet söhbet ömikige bashchiliq qilghan lodi gyari, béyjing hökümitining tibet mesilisini burunqigha qarighanda téximu semimiy sözlishishke intiliwatqanliqini bayqidim, dégen. (Erkin)