Dalay lama yaponiyini ziyaret qilidu

Tibet rohani dahisi dalay lama yaponiyining xiroshima rayonidiki bir diniy mezhepning teklipi boyiche bu yil 10 - ayning 30 - künidin 11 - ayning 10 -künigiche yaponiyini ziyaret qilidu. U, yaponiyidiki ziyariti jeryanida buddizimning diniy telimatliri heqqide nutuq sözleydu we xiroshimada ötküzilidighan diniy pa'aliyetlerge ishtirak qilidu.

Yaponiye hökümiti dalay lamaning ziyaret telipini qobul qilish bilen birge, siyasiy pa'aliyet bilen shughullanmasliqini shert qilip qoyghan. Dalay lama axirqi qétim yaponiyini ötken yili 4 - ayda ziyaret qilghan we ziyaret jeryanida yaponiye parlamént ezaliri bilen körüshüp, tibet mesilisini muzakire qilghan idi. Netijiside bu xitay da'irilirining naraziliqini qozghighan. Tibet rohani dahisining yaponiye ziyariti xitay - yaponiye munasiwiti yiriklishiwatqan bir mezgilge toghra keldi.

Xitay hökümiti yaponiye bash ministiri koyzumini yasikuno buzrukgahini ziyaret qilish bilen eyiblimekte we xitay - yaponiye otturisida sansako taqim arallirining igilik hoquqi heqqidiki ixtilaplar kücheymekte. Bolupmu xitayning herbiy tereqqiyati we xitay herbiy xam chotining yéqinda yene 14 % östürülgenliki yaponiyini bi'aram qilghan.

Yaponiye tashqiy ishlar ministiri taro aso , amérika Wall Street Journal gézitige yazghan maqaliside xitayni " impiriye döliti" bolush yoligha méngishtin waz kéchishke chaqirghan. Dalay lama tibetke aliy aptonomiye telep qilidighanliqini tekitlisimu, lékin xitay hökümiti uni bir tereptin bölgünchilik" bilen eyiblise, yene bir tereptin uning wekilliri bilen söhbet élip barmaqta. (Erkin)