Далай лама хитайға қаратқан мөтидил сияситиниң тибәт үчүн пайдилиқ икәнликини тәкитлимәктә


2005.03.14
Share on WhatsApp
Share on WhatsApp

Тибәтниң диний вә сиясий даһийси далай лама хитай һөкүмитигә қаратқан мөтидил сияситиниң тибәт хәлқи үчүн пайдилиқ икәнликини тәкитләп, хитай һөкүмитидин униң тибәткә қайтишиға рухсәт беришини тәләп қилди.

Далай лама дүшәнбә күни "җәнубий җоңгу сәһәрлик гезити" дә елан қилған баянатида, тибәтниң хитайдин мустәқиллиқини елиш үчүн күрәш қилмайватқанлиқини тәкитләп, тибәт мәдәнийити вә буддизм хитай мәдәнийтиниң бирқисми, нурғунлиған хитай яшлири тибәт мәдәнийитини яхши көриду, деди.

Гәрчә далай лама узундин бири хитайдин аптономийә тәләп қилидиғанлиқини тәкитләп келиватқан болсиму, лекин хитай һөкүмити йәнила далай ламани бөлгүнчи дәп әйибләп, униң тибәтниң мустәқиллиқи тәлипидин пүтүнләй ваз кечип, тибәтни хитайниң айрилмас бирқисми дәп етирап қилишини тәләп қилмақта.

Далай лама риясәтчилик қиливатқан мәркизи һиндистандики тибәт сәргәрдан һөкүмити, бирнәччилигән тибәт тәшкилатлиридин тәшкил тапқан болуп, бир қисим тибәт тәшкилатлири далай лама ниң хитайға қаратқан юмшақ сияситини қоллаватқан болсиму, тибәт яшлар қурултийи қатарлиқ тибәт тәшкилатлири далай ламаниң хитайға қаратқан сияситигә түптин қарши чиқмақта. Улар далай ламани тәслимчи дәп әйибләп , униңдин хитайға қарши қаттиқрақ бир сиясәт елип беришни тәләп қилмақта. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.