Хитай һөкүмити росийиниң далай ламаға виза бәргәнликигә қаттиқ наразилиқ билдүрди


2004-11-28
Share

Хитай һөкүмити шәнбә күни баянат елан қилип, росийиниң тибәтниң диний даһиси далай ламаға веза бәргәнликигә қаттиқ нарази болғанлиқини билдүрди.

Буниң алдида тибәтниң сүргүндики һөкүмитиниң баянатчиси, русийә һөкүмитиниң далай ламаға виза берип, русийини зиярәт қилишиға рухсәт қилғанлиқини билдүргән иди. Мәзкур баянатчиниң ейтишичә, далай лама дүшәнбә күни русийиниң қалмақистан райониға йолға чиқиши мумкин.

Русийә ташқи ишлар министирлиқиниң әмәлдарлири техи далай ламаға виза берилгәнлик һәққидики мәлуматларни испатлимиди. Русийиниң қалмақистан районида 300 миң аһалә бар болуп, уларниң йерими буддистлар. Мәзкур райондики будда диний рәһбири далай ламани бу айда зиярәткә келишкә тәклип қилған иди.

Русийә ташқи ишлар министирлиқи гәрчә далай ламаниң тибәтниң алий аптономийисини тәрғип қилидиған паалийәтлирини қоллимайдиғанлиқини билдүргән болсиму, бирақ хитай ташқи ишлар министири ли җавшиң йәнила русийигә қаттиқ наразилиқ билдүрүп, "далай лама бир адәттики диний зат әмәс, у хитайни парчилаш йолида һәрикәт қиливатқан бөлгүнчи унсур. Хитай һәр қандақ дөләтниң далай ламаға зиярәт пурсити берип, униң хитайни парчилайдиған паалийәтләрни елип беришиға йол қоюшиға қәтий қарши туриду" диди.

Хитай һөкүмитиниң қаршилиқиға қаримастин, далай лама әң балдур дегәндә дүшәнбә күни русийигә қаратқан зияритини башлиши мумкин. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт