Xitay hökümiti rosiyining dalay lamagha wiza bergenlikige qattiq naraziliq bildürdi

Xitay hökümiti shenbe küni bayanat élan qilip, rosiyining tibetning diniy dahisi dalay lamagha wéza bergenlikige qattiq narazi bolghanliqini bildürdi.

Buning aldida tibetning sürgündiki hökümitining bayanatchisi, rusiye hökümitining dalay lamagha wiza bérip, rusiyini ziyaret qilishigha ruxset qilghanliqini bildürgen idi. Mezkur bayanatchining éytishiche, dalay lama düshenbe küni rusiyining qalmaqistan rayonigha yolgha chiqishi mumkin.

Rusiye tashqi ishlar ministirliqining emeldarliri téxi dalay lamagha wiza bérilgenlik heqqidiki melumatlarni ispatlimidi. Rusiyining qalmaqistan rayonida 300 ming ahale bar bolup, ularning yérimi buddistlar. Mezkur rayondiki budda diniy rehbiri dalay lamani bu ayda ziyaretke kélishke teklip qilghan idi.

Rusiye tashqi ishlar ministirliqi gerche dalay lamaning tibetning aliy aptonomiyisini terghip qilidighan pa'aliyetlirini qollimaydighanliqini bildürgen bolsimu, biraq xitay tashqi ishlar ministiri li jawshing yenila rusiyige qattiq naraziliq bildürüp, ”dalay lama bir adettiki diniy zat emes, u xitayni parchilash yolida heriket qiliwatqan bölgünchi unsur. Xitay her qandaq döletning dalay lamagha ziyaret pursiti bérip, uning xitayni parchilaydighan pa'aliyetlerni élip bérishigha yol qoyushigha qet'iy qarshi turidu“ Didi.

Xitay hökümitining qarshiliqigha qarimastin, dalay lama eng baldur dégende düshenbe küni rusiyige qaratqan ziyaritini bashlishi mumkin. (Arzu)