Dalay lama wekili: xitayning tibet mesiliside ipade bildüridighan waqti keldi

Tibetning diniy dahisi dalay lamaning alahide wekili lodi geri 26 ‏- iyul küni chet'el metbu'atlirigha, xitay da'irilirining dalay lamagha qaratqan pozitsiyisidin qattiq epsuslan'ghanliqini bildürdi.

Dalay lama, uzundin béri xitay kommunistik partiyisi bilen siyasiy ramka ichide tibet mesilisini hel qilishini ümid qilip kelgen bolsimu, biraq xitay hökümiti dalay lamani " tibetning müsteqilliqini terghip qildi " dep izchil eyiblep keldi.

Tibetning sürgündiki hökümiti diniy erkinlikni terghip qilish bilen birge tibet medeniyitini qoghdashni özlirining asasliq nishani qilghan bolup, tibetning diniy dahisi dalay lamamu xitay hökümitidin, tibetning müsteqilliqini terghip qilmaydighanliqini we kelgüside tibette wezipe élish muddi'asiningmu yoq ikenlikini, özining peqet tibetke heqiqiy aptonomiye bérilishi bilen , özgiche alahidilikke ige tibet medeniyitining saqlinishi hemde tibetning tereqqiyatqa érishishinila ümid qilidighanliqini bildürmekte.

2002 ‏- Yilidin béri, béyjing hökümiti dalay lamaning wekilliri bilen 6 qétim gheyri resmiy yosunda uchrashti. Lékin bu uchrishishlar héchqandaq netije bermidi. Dalay lamaning alahide wekili lodi geri" : hazir béyjingning emeliy herikiti bilen ipadisini bildüridighan waqti yétip keldi" déyish arqiliq, eger béyjingning tibet mesilisige tutqan pozitsiyisi yenila passip dawamlishiwerse , özining dalay lamaning wekili bolush wezipisidin istipa béridighanliqini tekitlidi.

22 ‏- Iyul küni , Uyghur milliy herikitining rehbiri rabiye qadir xanim gérmaniyining hamburug shehiride dalay lama bilen uchrashqan idi. (Eqide)