Dalay lama xitayni, "térrorluq bilen hakimiyet yürgüzüwatqan bir saqchi döliti," dep eyiblidi

Bir nechche yildin béri, tibet mesilisining bir terep qilinishi üchün "ottura yol" nezeriyini otturigha qoyup, béyjing hökümitige qarshi yumshaq bir pozitsiyide bolup kelgen tibetlerning diniy we siyasiy dahisi dalay lama, yéqinda tibette yüz bergen qozghilangdin kéyin, xitay hökümitige qaratqan tenqidlirini kücheytti.

Dalay lama, shenbe küni, hindistanning paytexti yéngi déhlida ötküzülgen muxbirlarni kütüwélish yighinida bergen bayanatida, béyjing hökümitini, tibetke xitay köchmenliri yötkesh arqiliq, tibetlerni öz wetinide az sanliq millet ehwaligha chüshürüshke hemde tibet medeniyitini yoqutushqa urunuwatidu dep eyiblep, xitay dölitini "térrorluq bilen hakimiyet yürgüzüwatqan bir saqchi döliti" dep körsetti.

Amérika birleshme agéntliqining xewer qilishiche, dalay lama bayanatida shundaqla, xitay hökümitini, kishilik hoquq depsendichiliki sewebidin, muqimsizliq girdabigha chüshüp kétishi mumkinliki toghrisida agahlandurghan.

Tibetning diniy we siyasiy dahisi xelq'ara jama'etni, tibettiki qalaymiqanchiliqni toxtitish üchün yardemge chaqirip," bizde adalet, heqiqet we semimiyettin özge qoral yoq, uning üchün xelq'ara jama'etni yardemge chaqirimen " dégen.

Dalay lama jüme küni, xitay xelqige murajet qilip, ularni tibet mesilisining bir terep qilinishigha yardem bérishke chaqirghan idi. (Ömer qanat)