Dalay lama amérika ziyaritide prézidént bush bilen körüshüshi mumkin

Bash shtabi washin'gtondiki " xelq'ara tibetke yardem bérish herikiti" ning charshenbe küni ashkarilishiche, tibetning diniy dahisi dalay lama kiler ayda amérikigha qilidighan ziyaritide, prézidént jorj bush bilen körüshüshi mumkin.

Mezkur teshkilatning bildürüshiche, dalay lama 8 - noyabir küni washin'gton'gha qilidighan 10 künlük ziyaritini bashlaydighan bolup, u amérika prézidénti jorj bush, amérika dölet mudapi'e ministiri kondiliza rayis qatarliq dölet rehberliri bilen körüshüshi mumkin iken.

Prézidént jorj bush 2001 -yili xitayning qet'iy qarshiliqigha qarimastin, dalay lama bilen söhbet ötküzgen idi. U shundaqla xitayni dalay lama bilen söhbet ötküzüshke chaqirghan.

Xelq'ara tibetke yardem bérish herikitining bildürüshiche, dalay lamaning bu qétimqi amérika ziyariti " intayin halqiliq" peytte élip bérilghan bolup, " tibet xelqi üchün tarixiy bir purset" hésablinidiken.

Ularning ashkarilishiche, bu yil 7 - ayda, amérika qatarliq ellerning bésimi astida xitay hökümet wekilliri dalay lama elchiliri bilen shiwitsariyining paytexti bérn shehiride tünji qétim söhbet ötküzgen. Bu ikki terepning tötinchi qétimqi uchrushushi bolsimu, üchünchi dölettiki tünji uchrushushi idi.

Dalay lama bu qétimqi ziyaritide orunlashturulghan bir yighilishta yene, Uyghurlarning kishilik hoquq köreshlirigimu alahide baha béridighan bolup, u qétimqi yighilishqa ataqliq Uyghur kishilik hoquq pa'aliyetchisi rabiye qadir xanimmu qimmetlik méhman süpitide teklip qilin'ghan. (Arzu)