Dalay lama gérmaniye ziyaritide an'géla mérkél bilen körüshidu

Gérmaniye da'irilirining ashkarilishiche, tibet rohani dahisi dalay lama kéler hepte gérmaniyide élip baridighan ziyaritide gérmaniye bash ministiri an'géla mérkélning ayrim körüshüshige muyesser bolushi mumkin. Eger körüshüsh tosalghusiz emelge ashsa, bu tibet rohani dahisi üchün misli körülmigen bir uchrishish bolidu.

Fransiye axbarat agéntliqining xewer qilishiche, an'géla mérkélning bayanatchisi, dalay lamaning 23 - séntebir küni tunji qétim gérmaniye bash ministiri bilen uchrishidighanliqini bildürgen. Gérmaniye hökümitining bayanatchisi ulrix wélhém, eger bu körüshüsh xitayning ghezipini qozghisa, gérmaniye hökümitining buninggha qayturidighan inkasini sorighan muxbirgha, béyjing gérmaniyining tibet mesilisidiki meydanini bilidighanliqini tekitligen. U, " tibetke munasiwetlik kishilik hoquqi mesililirini biz da'im xitay terepke yetküzüp turuwatimiz. Bolupmu xitay - gérmaniye kishilik hoquq söhbiti we xitay ‏- yawropa ittipaqi kishilik hoquqi söhbetliride bu mesilini otturigha qoyup kéliwatimiz " deydu.

Dalay lama, meqsidi tibetning medeniyet we diniy jehettiki aliy aptonomiyisini qolgha keltürüsh ikenlikini qayta - qayta tekitlisimu, lékin xitay hökümiti uni " bölgünchilik" qilish bilen eyiblimekte.

Bu yil 5 ‏- ayda 6 ‏- nöwetlik xitay - tibet söhbiti béyjingda netijisiz axirlashqandin kéyin, xitay hökümiti tibet aptonom rayonida dalay lamaning tesirini tazilash herikiti qozghidi. Dalay lama gérmaniyini axirqi qétim bu yil 6 ‏- ayda ziyaret qilghan bolup, u bu ziyaritide dunya Uyghur qurultiyi re'isi rabiye qadir xanim bilen hamburgda uchrashqan idi. Dalay lama ötken hepte ispaniye ziyaritini bashlighandin kéyin, xitay hökümiti ispaniye da'irilirige naraziliq bildürgen. (Erkin)