Mérkél xanim olimpik murasimigha qatnashmaydu, wén jyabaw dalay lama bilen sözlishishke teyyar

30 - Mart küni gérmaniye tashqi ishlar ministiri shtéyinmer resmiy türde bash ministiri an'géla mérkél xanimning 2008 - yilliq béyjing olimpik tenheriket yighinining échilish murasimigha qatnashmaydighanliqini élan qildi.

En'giliye b b s radi'o téléwiziye shirkitining bu heqtiki uchuridin melum bolushiche, mérkél xanimdin bashqa yene gérmaniyining tenterbiye ishlirigha mes'ul ichki siyasiy ishlar ministirimu bu murasimgha qatnashmaydu. Buningdin ilgiri fransiye prézidénti sarkozining belki qatnashmaydighanliqi bildürülgen bolsimu, emma téxi resmiy jakarlanmidi.

Emma, yekshenbe küni xitay bash ministiri wén jyabaw la'osning paytextide xongkong muxbirlirining so'aligha jawab bergende dalay lama mesilisini tilgha élip, " junggoning dalay lama bilen sözlishish ishiki bashtin - axiri ochuq" dégen. U, yene sözide eger dalay lama musteqilliq teshebbusini, bolupmu uninggha körsitiliwatqan bésimlarni tashlisa, hazir tibette körülüwatqan zorawan pa'aliyetlerni toxtatsa, tibet we teywenning junggoning ayrilmas bir qisimi ikenlikini étirap qilsila, biz uning bilen sözlishishni eslige keltürimiz we dawamlashturimiz" dep tekitligen.

Dalay lama bilen sözlishish mesilisini amérika we gherb rehberliri izchil tekitlep kéliwatqan bolup, hetta dalay lamamu musteqilliqtin waz kéchip, tibetni xitayning aliy aptonomiyisi qilishqa razi bolghan, emma béyjingning tibetke aliy muxtariyet berse, Uyghurlarningmu buningdin telep qilishidin ensirep, bu qedemni basmighanliqi tehlil qilinmaqta. (Ümidwar)