Tibet merkizi lxasadiki namayish toqunushqa aylandi

Tibet merkizi lxasada birqanche kündin béri dawamlishiwatqan namayish jüme küni toqunushqa aylan'ghan. Eng yéngi xewerlerde ghezeplen'gen namayishchilarning saqchi mashina we soda dukanlirigha ot qoyghanliqini bildürdi. Weqeni öz közi bilen körgüchiler lxasa shehiride oq awazi anglan'ghanliqi, 2 neper namayishchi lamaning naraziliqini ipadilesh üchün özini öltürüwalmaqchi bolghanliqi we bir qanche yüz yerlik ammining namayishqa qoshulghanliqini ilgiri sürmekte.

Lxasadiki bir doxturxanining xadimi, on nechche yaridarning doxturxanigha élip kélin'genlikini bildürgen. Amérikining xitaydiki elchixanisi amérika puqralirigha chiqarghan sayahet uqturushida eskertishiche, " elchixana lxasadiki bir amérika puqrasining neq meydandin bergen xewirini tapshurup alghan, beziler oq awazi anglighan we zorawanliq weqesi yüz bergenlikining alametliri bayqalghan."

Lxasadiki namayish düshenbe küni lamalarning naraziliq herikitidin bashlan'ghan bolup, naraziliq herikiti nahayiti tézla lxasa etrapidiki ibadetxanilargha kéngeygen, peyshenbe künidin bashlap yerlik puqralar lamalargha hemdemde boldi. Lxasa shehiridiki séra ibadetxanisining lamaliri bolsa achliq élan qilghan.

Lxasadiki namayish xelq'ara jem'iyetning diqqitini qozghimaqta. Aldinqi küni amérika awam palata re'isi nensi pelusi, xitay da'irilirini tibet namayishchilirini basturush bilen eyibligen idi.

Jüme küni kanada tashqi ishlar ministirliki xitay da'irilirini eyiblep, tibet puqralirining namayish qilish hoquqigha hörmet qilinishini we tibet namayishchilirining basturulushidin endishe qiliwatqanliqini élan qildi. Xewerlerde xitay saqchi qisimlirining lxasadiki merkizi kochilarni qamal qilip, chet'ellik sayahetchilerning tibetke kirishi cheklen'genlikini bildürdi. (Erkin)