Xitay hökümiti tibette térrorchiliqqa qarshi herbiy manéwir élip bardi

Xitay hökümiti tibetning merkizi lasada térrorchiliqqa qarshi herbiy manéwir ötküzdi. Xitay hökümitining zuwani bolghan shinxu'a agéntliqining bildürüshiche, mezkur herbiy manéwir yekshenbe küni ötküzülgen.

Üch sa'etche dawamlashqan manéwirgha azadliq armiye jengchiliri, saqchilar, herbiyler we xelq eskerliri birlikte qatnashqan. Ular bu jeryanda partlitishqa, ayropilan we mashinilarni bulash weqelirige we bi'o-ximiyilik hujumlargha qarshi turush, shundaqla térrorchilargha qorshap zerbe bérish téxnikilirini meshiq qilghan.

Shinxu'a agéntliqi manéwirni teshkilligüchilerning sözini neqil keltürüp,” xelq'arada térrorluq weqeler köp yüz bermekte. Biz bu manéwir arqiliq tibet rayonining térrorluq hojumlargha qarshi inkas qayturush iqtidarini mölcherlimekchi“ Dep körsetken.

Xitay hökümitining mezkur herbiy manéwirni élip barghan waqti del sürgündiki tibetlerning diniy dahiysi dalay lama béyjinggha ikki neper alahide elchisini ewetken mezgilge toghra kélidu. Xelq'ara kishilik hoquq teshkilatliri xitay hökümitining xelq'ara térrorchiliqqa qarshi köreshni bahane qilip, tibet we Uyghur élige bolghan kontrolluqini kücheytiwatqanliqidin endishe qilmaqta. (Arzu)