Tibetlik rahiblar, xitay hökümitining tibet weziyitini tinch qilip körsitish pilanini buzuwetti

Peyshenbe küni, tibetning paytexti lxasa shehiride, tibetlik buddist rahiblar, diniy erkinlik dep shu'ar towlap, xitay hökümitining chet'el muxbirlirigha tibetni ziyaret qildurush arqiliq, dunyagha tibet weziyitini tinch we normal körsitish pilanini bit - chit qilip tashlidi.

Xitay hökümiti teripidin teshkillen'gen mezkur ziyaretke qatnashqan, amérika birleshme agéntliqining muxbiri charlis hutslerning lxasadin xewer qilishiche, chet'ellik muxbirlar, xitay da'irilirining orunlashturushi bilen lxasadiki jukang butxanisini ziyaret qiliwatqan bir mezgilde, 30 neper etrapida tibetlik buddist rahib, tibetke erkinlik, tibette erkinlik yoq, diniy erkinlik dep shu'ar towlap yégha - zare qilghan. Rahiblar shundaqla, dalay lamaning tibettiki qozghilang bilen munasiwiti yoqluqini bildürgen.

Xewerde éytilishiche, xitay hökümet xadimliri, tibetlik rahiblarning tibetke azadliq sho'arliri dawamlishiwatqan bir ehwal astida, chet'ellik muxbirlarni tézdin budxanidin yiraqlashturghan.

Amérika birleshme agéntliqi muxbirining bildürüshiche, namayishchi rahiblarning biri, bular bizdin dalay lamagha qarshi chiqishimizni telep qiliwatidu, bu toghra ish emes, dégen.

Xewerde tekitlinishiche, namayishchi rahiblar deslepte tibetche sözligen, andin chet'ellik muxbirlargha öz muddi'asini chüshendürüsh üchün, xitayche sözleshke bashlighan. Ular chet'ellik muxbirlargha, bu herikiti sewebidin xitay hökümiti teripidin qolgha élinidighanliqini, emma özlirining pikrini ipadilesh üchün qolgha élinishni közge alghanliqini tekitligen. (Ömer qanat)