Hindistanda yashaydighan sürgündiki tibetler xitaygha qarshi namayish qildi

Hindistanning daramsala rayonida yashaydighan sürgündiki nechche yüz kishilik tibet musapirliri jüme küni xitaygha qarshi naraziliq namayishi ötküzüp, xitay da'iriliri teripidin muddetsiz qamaq jazasigha höküm qilin'ghan xitay türmidiki tibet lamasi tenzin déleg rénpochining qoyup bérilishni telep qildi.

Birleshme axbarat agéntliqining xewerqilishiche, tibetlik namayishchilar kishilerge tenzin rénpochining resimini tarqatqan we rénpochini qoyup bérishni telep qilip imza toplash pa'aliyiti élip barghan.

Namayishchilarning muxbirlargha eskertishiche, bu qétimqi namayish xitay hökümitining tibettiki zorawanliqini pash qilishni meqset qilghan bolup, ular rénpochini qoyup bérishni telep qilip toplan'ghan imzaning b d t gha yétip bérishini ümid qilidighanliqini bildürgen.

Xewerlerge qarighanda bu yil 56 yashlardiki tenzin dileg rénpochi we uning yardemchisi 2002- yili xitay da'iriliri teripidin ayrim - ayrim ölüm jazasigha höküm qilinip, kéchiktürüp ijra qilishqa buyrulghan. Xitay da'iriliri bu 2 tibetlik rahibni bir kishining ölüshini keltürüp chiqarghan bir qatar partiltish heriketlirini élip bardi we tibet musteqilliqini telep qildi, dep eyibligen idi. Kéyinche xitay edliye da'iriliri xelq'ara jem'iyetning bésimi astida rénpochigha bérilgen ölüm jazasini muddetsiz qamaq jazasigha özgertken. (Erkin)