Xelq'ara tibet herikiti xelq'ara olimpik komitétigha jonggo üstidin shikayet qildi

2008 - Yili ötküzülidighan béyjing olimpik musabiqisigha 2 yil qalghan küni xelq'ara tibet herikiti teshkilati xelq'ara olimpik komitétigha xet yézip, mezkur organning junggoning kishilik hoquq weziyitige köngül bölüshke chaqirdi we jonggo da'irilirining tibet aptonom rayonidiki kishilik hoquqqa xilap heriketlirini eyiblidi.

Xelq'ara tibet herikiti teshkilati olimpik komitétigha yazghan xétide, jonggo hökümiti xitay, tibet we Uyghur rayonlirida tutup turuwatqan siyasi mehbuslarni qoyup bérishi kérek, dep yazghan. Shu küni béyjing olimpik komitéti muxbirlarni kütüwélish yighini chaqirip, olimpik musabiqisining teyyarliq ehwallirini tonushturdi.

Fransiye axbarat agéntliqining xewer qilishiche, béyjing olimpik komitétitining mu'awin ijra'iye re'isi wang wéy, béyjing shehirining mu'awin sheher bashliqi lyu jixu'aning dawamliq tekshürüliwatqanliqini bildürgen.

Xitay da'iriliri lyu jixu'ani bu yil 6 - ayda xiyanetchilik bilen eyiblep wezipisidin élip tashlighandin kéyin, Uyghur aptonom rayonigha élip bérip soraq qilidighanliqini jakarlidi. Lékin uning Uyghur aptonom rayonida qeyerde soraq qiliniwatqanliqini we némishke bu rayonda soraq qilinidighanliqini chüshendürmidi.

Lyu jixu'a ilgiri béyjing shehirining olimpik qurulushigha mes'ul sheher bashliqi idi. Fransiye axbarat agéntliqining eskertishiche, olimpik musabiqisigha 2 yil qalghan bolsimu, lékin béyjing puqraliri béyjing shehirining hawa bulghinishi we qatnash zichliqidin endishe qilmaqta iken. (Erkin)