Тибәт кишилик һоқуқ тәшкилати йоқап кәткән 32 тибәтликликни сүрүштә қилмақта

Баш штаби һиндистандики тибәт кишилик һоқуқ вә демократийә мәркизи дүшәнбә күни бирләшкән дөләтләр тәшкилатидин сентәбир ейида хитай- непал чегрисида хитай әскәрлири оқ чиқарғандин кейин из-дерәксиз йоқ болуп кәткән 32 тибәтликниң қайси йәрдә икәнликини ениқлап бериши үчүн хитай һөкүмитигә бесим ишлитишини тәләп қилди.

Көпчиликкә мәлум болғандәк, хитай әскәрлири 30‏-сентәбир күни хитай - непал чегрисида тибәттин һиндистанға қачмақчи болған тибәтлик қачқунларни оққа тутқан болуп, вәқәдә икки тибәтлик өлгән вә көпинчиси кичик балилардин тәшкил тапқан 32 тибәтлик из-дерәксиз йоқ болуп кәткән иди.

Хитай һөкүмити, хитай чегра қоғдаш қисимлириниң авал тибәтликләрни чегридин өтмәслик тоғрисида агаһландурғанлиқини, тибәтлик қачқунлар әскәрләргә һуҗум қилғандин кейин, андин хитай әскәрлириниң өзлирини қоғдаш үчүн оқ чиқарғанлиқини билдүрди. Әмма вәқәгә шаһит болған чәтәллик тағчилар тәрипидин елинған синалғу линтиси, хитай әскәрлириниң һечқандақ агаһландуруш бәрмәйла тибәтлик қачқунларни оққа тутқанлиқини көрсәтмәктә.

Хитай чегра қоғдаш қисимлириниң һуҗумиға учриған тибәт қачқунларниң 41 и 10‏- айниң 22‏- күни сақ саламәт непал арқилиқ һиндистанниң пайтәхти йеңи деһлигә йетип кәлгән.

Тибәт кишилик һоқуқ вә демократийә мәркизиниң директори урган тәнзин, бизчә мәзкур 32 тибәтлик хитай даирилири тәрипидин қолға елинған. Шуңа уларниң қоюп берилишини тәләп қилимиз, деди. (Қанат)