Tibet teshkilatliri xitayning yash ösmürlerni qattiq qiynash qilmishini eyiblidi

Tibet kishilik hoquq teshkilati 31 ‏- yanwar küni, xitayning, yash ösmür tibetlerni qéyin - qistaqqa almay derhal qoyiwitish heqqide yawrupa ellirige bergen wediside turmighanliqini qattiq eyiblidi.

Hindistanning dramsaladiki tibetliklerni kütiwilish merkizining mudiri do jéning metbu'atlargha, téxi yéngila xitay chégrisidin qéchip chiqqan 15 yashliq tibetlik ösmür ja yang zapéng heqqide melumat bérip, uning xitay saqchilirining wehshi jazaliridin qutulup, uzun musape we qéyinchiliqlarni bésish arqiliq saq - salamet hindistan'gha yétip kelgenlikini we uning salametlik ehwalining yaman emeslikini bildürdi.

Ja yang zaping, 2006 ‏- yili 9 ‏- ayda 75 neper tibetlik bilen birlikte qéchishni pilanlap, tibet bilen népal chégrisi tutishidighan jayda xitay chégra armiyisi teripidin oqqa tutulghan. Ular arisida ikki kishige oq tégip bir tibetlik rahip ayal neq meydanda jan üzgen. Xitay eskerliri köpinchisi yash ‏- ösmür we balilarni öz ichige alghan 32 ademni tutuwalghan, qalghan 42 adem hindistan'gha saq - salamet yétip barghan.

Ja yang zaping özining 49 künlük qamaq hayatini sözlep, özining saqchilar teripidin qattiq urulghanliqini we özidin kichik balilarningmu qéyin - qistaqqa élinip, hetta bezilirining 3 aygha yéqin solap qoyulghanliqini ashkarilidi.

Tibet herikitini himaye qilghuchi xelq'ara teshkilatning doklatida éytilishiche, her yili 2 mingdin 3 mingghiche tibetlik népal arqiliq hindistan'gha qéchip baridiken. Ularning üchtin biri quramigha yetmigen yash ‏- ösmürler bolup, ular xitay zulumidin qutulush, tibetning dramsaladiki tibet hökümitidin panahliq izdesh, tibetning diniy we medenyet en'enisini öginish bolupmu tibetning rohaniy dahisi dalay lamagha bolghan étiqadini bildürüsh meqsetliride tibettin qéchip chiqidiken. (Eqide)