Dalay lamaning wekilliri béyjingni ziyaret qilishqa yolgha chiqti

Yekshenbe küni béyjinggha qarap yolgha chiqqan tibetlerning sürgündiki rohani dahiysi dalay lamaning ikki alahide wekili, ikki yilning aldida qurulghan dalay lama bilen béyjing otturisidiki söhbet munasiwitini dawamliq ilgiri sürüshke tirishidu.

Hindistanning daramsala rayonidiki tibet sergerdan hökümitining bayanatchisi , dalay lamaning ikki alahide wekili lodi gyari bilen gélsang gyaltsénning xitaydiki ziyariti jeryanida tibetler olturaqlashqan bezi rayonlargha baridighanliqini bildürdi . Tibet sergerdan hökümiti bayanatchisining bildürüshiche , dalay lama öz wekillirining xitayni qayta ziyaret qilish pursitige érishkenlikidin memnun bolghan .

U , dalay lama xitay bilen bolghan uchrishishning axirqi hésabta tibet mesilisi boyiche emili söhbet ötküzülüshige türtke bolushini ümid qilidu dep körsetti . Dalay lama wekilliri yolgha chiqishning aldida 8 - séntebir küni dalay lama bilen uchriship uningdin yol-yoruq alghan . Xitay hökümiti , 1959 - yildiki tibet qozghilingidin kéyin hindistan'gha chiqip ketken dalay lama bilen 1979 - yili tunji qétim munasiwet ornatqan idi . Shuningdin kéyinki 15 yil ichide béyjing hökümiti dalay lama wekillirining 4 qétim tibetni ziyaret qilishigha yol qoyghan . Béyjing da'irilining 1993 - yili üzülüp qalghan dalay lama bilen bolghan söhbiti , 2002 - yili 9 - ayda eslige kelgen idi. (Erkin)