Хитай кечиккән болсиму, тибәтниң пайтәхтиниң әнәниви характерини қоғдашқа тиришиватиду


2004.09.20

Франсийә ахбарат агентлиқиниң хәвәр қилишичә, хитай һөкүмити тибәтниң пайтәхти ласани өзиниң қәдимий услуби бойичә қайтидин қуруп чиқиш үчүн бир һәрикәт башлиған.

Шинхуа агентлиқиниң билдүрүшичә, ласаниң қәдимий әнәниви характерини қоғдаш һәрикити ноябир ейиниң ахириғичә давамлишидикән. Хәвәрдә ейтилишичә, бу һәрикәт җәрянида, ласаниң икки асаслиқ кочисидики биналар тибәт милли услубида ясап чиқилидикән.

Ласада узун йиллардин бири давамлишип келиватқан пилансиз шәһәрлишиш вә шәһәр нопусиниң тиздин ешиши, ласаниң миллий вә тарихий характерини йоқитишқа қарап йүзлинишигә сәвәп болған.

Хитай һөкүмитиниң ласаниң әнәниви характерини қоғдаш үчүн башлиған һәрикити уйғур паалийәтчилириниң диққитини қозғимақта. Уларниң ейтишичә, охшаш вәзийәтни уйғур районидиму байқаш мумкин. Уйғур аптоном райониниң мәркизи үрүмчи өзиниң милли характерини пүтүнләй йоқитиш алдида турмақта. Һәтта қәшқәр қатарлиқ уйғурлар мутләқ көп санлиқни игиләйдиған уйғур қәдимий вә тарихий шәһәрлириму өзиниң милли характерини йоқитиш тәһдиди астида туриватиду. Йеқинда қәшқәрдики һейтгаһ җамаәси әтрапидики қәдимий уйғур базар вә мәһәллириниң орниға игиз қәвәтлик биналарниң селинишқа башлиғанлиғи буниң бир испати.

Чәтәлләрдики уйғур паалийәтчилириниң билдүрүшичә, тибәтниң пайтәхти ласаниң әнәниви характерини қоғдаш үчүн һәрикәт башлиған хитай һөкүмитиниң, уйғур шәһәрлириниң милли характерини йоқитиш үчүн һәрикәт қилиши, бейҗиң һөкүмитиниң уйғурларға қаратқан сияситиниң әсли маһийитини ашкарилайду. (Қанат)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.