Далай хитай һөкүмитини тибәт раһибиниң һаятини сақлап қелишқа чақирди

Тибәтләрниң сүргүндики диний даһийси далай лама пәйшәнбә күни хитай һөкүмитини, өлүм җазаси берилгән тибәт раһибиниң һаятини сақлап қелишқа чақирди.

Америка бирләшмә ахбарат агентлиқиниң хәвиригә қариғанда, хитай һөкүмитиниң тибәт раһиби 52 яшлиқ тензен делег ринпочиға бәргән өлүм җазасини иҗра қилиш вақти 12 - айниң 2 - күни тошидиған болуп, далай лама хитай һөкүмитиниң бу мәсилини қайта ойлишип көрүшини тәләп қилди.

Далай сөзидә, "хитай һөкүмити вә мунасивәтлик әмәлдарлар илгири бәзи мәсилиләргә қайта ойлишиш пурсити яратқан иди. Шуңа мән уларниң тибәт раһиби ринпочиниң мәсилисидиму мушундақ қилишини үмид қилимән" деди.

Адәттә хитайда өлүм җазасини икки йил кечиктүрүп иҗра қилиш җазаси вақит тошқандин кейин, муддәтсиз қамақ җазасиға өзгәртилиду. Әмма тибәт вә уйғурларниң мәсилиси сәзгүр тема һисабланғачқа, ринпочиниң мәсилиси башқичә бир тәрәп қилиниши мумкин.

Хитай һөкүмити 2002 - йили 12 - айда тензин ринпочи билән 28 яшлиқ лобсаң дондупқа сичуәнниң гәнзи дигән йеридә партлитиш садир қилған дегән җинайәт билән өлүм җазаси һөкүм қилған иди. Шундақла, лобсаң дондопни 2003 - йили 1 - айда етип, тензин ринпочиниң өлүм җазасини икки йил кечиктүрүп иҗра қилишни һөкүм қилди.(Пәридә)