Җорҗ буш далай ламани ақ сарайда күтүвалди


2005.11.10
Share on WhatsApp
Share on WhatsApp

Америка президенти җорҗ буш хитай һөкүмитиниң наразилиқиға қаримастин, америкини зиярәт қиливатқан тибәтниң диний вә мәнивий даһиси далай ламани ақ сарайда күтүвалди.

Ройтирс агентлиқиниң хәвиригә қариғанда, җурҗ буш вә униң ханими лора буш чаршәнбә күни кәчтә далай лама билән учрашқан. Әмма уларниң сөһбитиниң мәзмуни елан қилинмиған. Бу далай ламаниң президент буш билән 3 - қетим учришиши болуп һисаблиниду.

Президент бушниң киләр һәптә хитайға қилидиған зияритиниң һарписида, далай ламани күтивелиши, хитайниң қаттиқ наразилиқини қозғиди. Хитай ташқи ишлар министирлиқи пәйшәнбә күни баянат елан қилип, " биз һәр қандақ дөләт рәһбәрлириниң далай лама билән көришишигә қарши туримиз. Улар далай ламаниң бөлгүнчилик паалийәтлиригә сәһнә яритип бәрмәслики керәк" деди.

Әмма хитай ташқи ишлар министирлиқи, америка билән хитайниң диний әркинлик, кишилик һоқуқ вә тибәт мәсилилиридики ихтилаблириниң , президент җорҗ бушниң хитай зияритигә тосқунлуқ қилмайдиғанлиқини көрсәтти.

Тибәтниң диний даһиси далай лама дүшәнбә күни америдики зияритини башлиған . У сәйшәнбә күни вашингтонда америкидики алимлар билән өткүзгән йиғинда, гәрчә өз вәкиллириниң хитай даирилири билән төт қетим сөһбәт өткүзүп өз - ара ишәнч орнитишқа тиришқан болсиму, хитай һөкүмитиниң тибәттики бастуруш сияситидә яхшилиниш болмиғанлиқини билдүргән. Далай ламаниң америкидики зиярити 10 күн давам қилиду. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.