Хитайниң бесимиға учриған тибәт гүзили өз мәнпәәтидин ваз кәчти


2007-12-06
Share

22 яшлиқ " тибәт гүзили" зи ренҗиңда " җуңгу тибәт гүзили " дегән нам билән гүзәллик мусабиқисигә қатнишишни рәт қилди. Малайсияда өткүзүлмәкчи болған гүзәллик мусабиқисигә қатнишиштин чекинип чиққан зи ренҗиңда, пәйшәнбә күни йеңи деһлида мухбирларға ":тибәт һазирға қәдәр җоңгуниң мустәмликиси астида, әркинликкә еришкини йоқ, шуңа мән "җуңгу тибәт гүзили" дегән нам билән мусабиқигә қатнишишни һәргиз қобул қилмаймән" деди.

Зи ренҗиңданиң билдүрүшичә, мусабиқә оюштурғучилар җуңгу тәрәпниң бесими астида униңдин, икки йолдин бирини талливелишини, бири "җуңгу тибәт гүзили" дәп йезилған шәрәп ләвһәсини бойниға есип сәһнигә чиқишини, йәнә бири мусабиқигә қатнишиштин ваз кечишни тәләп қилған, зи ренҗиңда сөзидә йәнә, өзиниң бундақ сиясий бесим билән мәзкүр мусабиқигә қатнашмайдиғанлиқини тәкитлиди.

Илгири һиндистанниң дарамсала шәһиридә өткүзүлгән гүзәллик мусабиқисигә қатнишип, " тибәт гүзили" сайланған зи ренҗиңда малайсияда "хәлқара саяһәт гүзили " мусабиқисигә қатнишиш имтиязиға еришкән иди.

Тибәт сиясий паалийәтчилири, өзлириниң зи ренҗиңдадин пәхирлинидиғанлиқини әскәртип, барлиқ тибәт яшлирида бу хил роһниң урғушини тәшәббус қилди.

Бу арида тибәтниң диний даһиси далай лама, италийидә елип баридиған 11 күнлүк зияритини башливәтти. Гәрчә далай ламаниң италийә һөкүмәт хадимлири һәмдә рим папаси билән көрүшмәйдиғанлиқи илгири сүрүлгән болсиму, бирақ көзәткүчиләр униң һәр қайси һөкүмәтсиз тәшкилатлар вә диний әрбаблар билән көрүшидиғанлиқини пәрәз қилишмақта.

Хитай тәрәп изчил түрдә өзи билән дипломатик мунасивәт қурған дөләтләрниң мәйли қайси хил шәкилдә болсун, далай ламаниң зияритини қобул қилғанлиқидин қаттиқ нарази болуп кәлмәктә. (Әқидә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт