Тибәт мустәқиллиқ тәшкилати бейҗиңда ечилидиған олимпик йиғиниға вәкилләр өмики әвәтишни тәләп қилди

Тибәт мустәқиллиқ тәшкилати бейҗиңда ечилидиған олимпик йиғиниға вәкилләр өмики әвәтишни тәләп қилди

Йеқинда тибәт мустәқиллиқини тәшәббус қилидиған бир тәшкилат 2008 ‏- йили бейҗиңда ечилидиған олимпик йиғиниға өз вәкиллирини әвәтишни тәләп қилди.

Тибәтликләрниң мустәқиллиқ һәрикитини йеқиндин қоллап кәлгән хәлқара тибәтликләр һәрикитини қоллаш гурупписи чәтәлдики сәргәрдан тибәтликләрдин тәркип тапқан бир тәнтәрбийә үмикиниң қурулғанлиқини мәлум қилди һәмдә мәзкур тибәтликләр хәлқара олимпик комитетидин тәнтәрбийә өмикиниң бейҗиңда ечилидиған олимпик йиғиниға қатнишишиға рухсәт қилишини тәләп қилди.

Хәлқара тибәтликләр һәрикитини қоллаш гурупписиниң баянатчиси Lhadon Tethong ‏- " биз келәр йили 8 ‏- айда өткүзүлидиған олимпик йиғинида, тибәт байриқини егиз көтүрүп, йиғин мәйданиға башқа сипортчилар билән бирликтә, қәд көтүрүп киришни үмид қилимиз" дәп билдүрди.

Гәрчә, олимпик йиғиниға қатнишидиған спортчилар чоқум хитай ичидин таллинидиғанлиқи ениқ болсиму, тибәт тәшкилати йәнила өз тәлипини оттуриға қойған. Анализчиларниң билдүрүшичә, олимпик йиғининиң йеқинлишиши билән, тибәт мустәқиллиқ тәшкилатиниң хәлқара олимпик комитетидин мәзкур йиғинға қатнишишни тәләп қилиши хәлқара җәмийәтниң улар вә хитай оттурисидики тоқунушларға болған диққитини қозғаш икән.

Хитай һөкүмити өткән айда җумулаңма чоққисида хитай һөкүмитигә наразилиқ билдүргән 5 нәпәр америка пуқрасини сүргүн қилған. Гәрчә хитай һөкүмити тибәтни қәдимдин тартип хитайниң бир бөлүки дәп кәлгән болсиму, нурғунлиған тибәтликләр тибәтни узун бир муддәткичә,мустәқил һаләттә иди - дәп қаримақта. (Меһрибан)