Tibetlikler 2008‏- yilliq béyjing olimpik tenheriket yéghinigha qarshi naraziliq bildürdi

Shenbe küni hindistan we nipaldiki tibetlikler, 2008‏- yilliq olimpik tenheriket yéghinigha naraziliq bildürüsh üchün hindsitanning paytexti yéngi déhlide potbol musabiqisi ötküzdi. 2008‏- Yilliq béyjing olimpik tenheriket yéghini kéler yili 8‏- awghust küni bashlinidu. Yeni aldimizdiki charshenbe küni 2008‏- yilliq béyjing olimpik tenheriket yéghinining bashlinishigha bir yil qalghan bolidu.

Tibetlikler béyjing olimpik tenheriket yéghinigha qarshi orunlashturlghan potbol musabiqisini, hindistanning paytextidiki eng chong potbol meydanida ötküzüshni pilanlighan. Lékin tibet teshkilatlirining bildürüshiche, hindistan da'iriliri xitay hökümitining bésimi bilen musabiqining mezkur meydanda ötküzülishige ruxset qilmighan. Shunga tibetlikler potbol musabiqisini bir aliy mektep meydanida, hindistan saqchilirining nazariti asitida élip barghan.

Roytris agéntliqining xewer qilishiche, potbol musabiqisi axirlashqandin kéyin,"tibetni, 2008‏- yilliq olimpik tenheriket yighinigha qatnashturayli"!dégen'ge oxshash shu'arlar yézilghan, lozunkilarni kötergen 2000 gha yéqin tibetlik potbol meydani etrapida tibetning milliy bayraqlirini jewlan qaldurup, tibettiki xitay hakimiyitige qarshi namayish ötküzgen. Tibet teshkilatliri bundaq pa'aliyetler uyushturush arqiliq, xelq'ara jama'etning diqqitini téximu köp tibet mesilsige tartishni meqset qilmaqta.

2008‏- Yilliq olimpik tenheriket yéghinigha sahipxanliq qilish hoquqi béyjinggha bérilgen mezgilde, tibet teshkilatliri xelq'ara olimpik komitétidin, kishilik hoquqqa hörmet qilish toghrisidiki wedilirige emel qilishi üchün, béyjing hökümitige bésim ishlitishini telep qilghan idi.

Tibetlikler , Uyghurlar we xelq'ara kishilik hoquq teshkilatlirining bayan qilishiche, gerche 2008‏- yilliq béyjing olimpik tenheriket yéghinining bashlinishigha bir yil waqit qalghan bolsimu, lékin xitayning kishilik hoquq xatiriside héchqandaq yaxshilinish yüz bermigen, hetta tibet we Uyghur élidiki kishilik hoquq weziyiti téximu nacharlashqan. (Ömer qanat)