Ikki neper tibetlik xitay hökümitige bolghan naraziliqini özini öltürüwélish yoli bilen ipadilidi

Tibette jéching zéba losang we yangba gaching lochü isimlik ikki neper yashan'ghan lama muriti, xitay hökümitining bésimi we tehditliri astida arqa - arqidin özini ésip öltürüwalghan.

Istansimiz igiligen xewerge qarighanda, jéching zéba losang, ötken yili 9 ‏- ayning 8 ‏- küni ölüwalghan bolup, uning muriti tibetning erkinliki üchün élip bérilghan pa'aliyetlerge qatnashqanliqi üchün, u muriti bilen birge saqchilarning tekshürüshi astigha élin'ghan. Saqchi we hökümet xadimliri dawamliq ulargha tehdit sélip qattiq basturush herikiti élip barghandin sirt ularni urghan hemde haqaretligen. Jéching zéba tibet lama dinida özini öltürüwélishning éghir jinayet hésablinidighanliqini bilip tursimu axiri özini öltürüwélish yolini talliwalghan.

Yene bir yashan'ghan lama muriti yangba gaching lochü, ötken yili budizmgha a'it neziriyilerni bésip tarqatqanliqi üchün xitay da'iriliri teripidin siyasiy mesile peyda qilghan dégen eyibleshlerge uchrap, oxshashla nazaret qilish we her xil bésim tehditlerge uchrighan. Yangba gaching lochumu xitaylarning bésimgha berdashliq bérelmey ötken yili 11 ‏- ayning 4 ‏- küni a'iliside özini ésip öltürüwalghan.

Chet'ellerde yashawatqan tibetlerning bildürüshiche, gerche tibet lama dinida özini öltürüwélish jinayet hésablinip cheklen'gen bolsimu, emma xitay hökümitining siyasitige narazi bolghan tibetlerde özini öltürüwélish hadisiliri xéli köp qétim yüz bergen iken. (Eqide)