15 Yil türmide yatqan tibet rahibesi amérikigha yétip keldi

15 Yil xitay türmiside yétip chiqqan tibet rahibesi funsong nyijon xitaydin ayrilishqa ruxset qilinip, charshenbe küni amérikigha yétip keldi. U amérikigha kélishtin burun xitay da'iriliri uni xitaygha qarshi pa'aliyetlerge qatnashmasliq toghrisida agahlandurghan.

38 Yashliq funsong nyijon 2004‏- yili türmidin qoyup bérilgen bolsimu, lékin uning erkin pa'aliyetliri cheklen'gen hemde pasportqa iltimas qilishimu ret qilin'ghan idi. Uning qoyup bérilishi, xitay dölet re'isi xu jintawning amérikigha ziyaretke kélishidin burun bolghan. Amérikidiki söhbet fondi jem'iyitining re'isi jon kem, rahibening qoyup bérilishining xuning ziyariti bilen munasiwiti bar-yoqliqini bilmeydighanliqini éytti.

Funsong nyijon san-fransiskogha yétip kelgendin kéyin, özining amérikidek bir erkin döletke yétip kelgenlikidin intayin xushal bolghanliqini hemde uning qoyup bérilishige köp küch chiqarghan amérika hökümitige we tibetlerning diniy dahisi dalay lamagha köp rehmet éytidighanliqini bildürdi.

Funsong nyijon 1989‏- yili "dölet hakimiyitini aghdurush teshwiqati élip barghan" dégen jinayet bilen türmige tashlan'ghan idi. Funsongning éytishiche, u türmide éghir qiyin-qistaqlargha uchrighan hemde salametliki nacharlap ketken. (Peride)