Xitay hökümiti besh neper tibet rahibigha qamaq jazasi berdi

• 
  2006-02-07

Chet'eldiki tibet teshkilatlirining xewer qilishiche, xitayning gherbiy shimaldiki tibetler toplushup olturaqlashqan gensu, chingxey ölkiliride xitay hökümiti seyshenbe küni bir türküm tibet rahibi we rahibelirini tibet musteqilliqini telep qildi, dep eyiblep 18 aydin 3 yilghiche qamaq jazasigha höküm qilghan.

Birleshme axbarat agéntliqining erkin tibet herikiti teshkilatidin neqil keltürüshiche, qamaq jazasigha höküm qilin'ghan 5 neper rahib we rahibe, gensu we chingxey ölkisidiki en'eniwi tibet rayonida yashaydighan puqralar bolup, ular xelq'ara olimpik yighinining 2008 - yili béyjingda ötküzülüshige qarshi turghan we xitayning tibet aptonom rayonidiki hökümranliqigha xatime bérishni telep qilghanliqi üchün 2005- yili 5 - ayda qolgha élin'ghan. Qolgha élin'ghanlarning ikkisi rahib, üch nepiri rahibe iken.

Merkizi londondiki erkin tibet herikiti teshkilati bu heqtiki bayanatida, " üch neper buddist rahibesi bilen ikki neper buddist rahibi, tibet mesilisi hel bolmighiche xelq'ara olimpik yighinining béyjingda ötküzülüshige qarshi chiqqanliqi üchün qolgha élin'ghan " deydu. Erkin tibet herikitining eskertishiche, bu 5 neper kishi xitay sot mehkimisi teripidin bölgünchilikke yardem bérish, naraziliq xéti yézip, tibet musteqilliqini telep qilish we olimpik tenterbiye yighinining béyjingda ötküzülüshige qarshi chiqish qatarliq jinayetler bilen eyiblen'gen. (Erkin)