Тибәтләр билән хитай аманлиқ қисимлири чиңхәйдә тоқунушти

Йәрлик һөкүмәт әмәлдарлириниң хиянәтчиликигә қарши намайиш өткүзгән чиңхәйниң задо наһийисидики нәччә миңлиған тибәтләр, хитай сақчи қисимлири билән тоқунушти.

Әркин асия радиоси тибәт бөлүминиң игилишичә, вәқә 5 - айниң 20 вә 21 - күнлири йүз бәргән. Тоқунушта йәрлик һөкүмәт бинасиниң бәзи ишханилириға от қоюветилгән һәмдә етишиш йүз бәргән. Әмма тоқунушта адәмниң зиян- зәхмәткә учриған - учримиғанлиқи һәққидә ениқ мәлумат йоқ.

Задо наһийисидики исмини ашкарилашни халимайдиған бир һөкүмәт әмәлдари бундақ бир тоқунушниң болғанлиқини етирап қилған. Бирақ у вәқәни "җиддий әмәс" дәп тәсвирлигән.

Тибәт бөлүмимизниң йәрлик пуқралардин игилишичә, тоқунуш, задо наһийисидики һөкүмәт әмәлдарлириниң хиянәтчиликидин келип чиққан. Улар хошна тибәт районлирида қиммәтлик дора өсүмлүкини йиғишни халайдиған йәрлик тибәтләрдин 1500 йүән баҗ алған. Әмма йиғилған пулниң көп қисмини һөкүмәткә тапшурмиған. Бир нәччә тибәтлик дора өсүмлүки теримақчи болғинида, йәрлик һөкүмәт әмәлдарлири уларни чәклигән һәмдә уларниң пулини қайтуруп беришниң орниға сақчиларни чақирип, тибәтләрни бастурған. Буниң билән задо вилайитидики нәччә миңлиған тибәтләр сақчилар билән тоқунушқан.

Задо наһийиси тәвә болған чиңхәйниң юшу вилайитидики аһалиләрниң 98٪ и тибәтләр. Бирақ бу вилайәт хитай компартийисиниң һакимийитидә чиңхәй өлкисиниң тәвәликигә бөлүнгән. (Арзу)