Sichüende dalay lamaning tibetke qaytishini telep qilghan yüzligen tibetlik qolgha élindi

Xitayning sichüen ölkisidiki tibetler olturaqlashqan rayonda tibet rohani dahisi dalay lamaning tibetke qaytishini telep qilghan yüzligen tibetlik xitay saqchi da'iriliri teripidin qolgha élindi. Xelq'ara tibet herikiti teshkilatining radi'omizgha ashkarilishiche, bu weqe sichüenning lisang étnik tibet rayonida charshenbe küni yerlik tibetlerning en'eniwiy at beyge musabiqisi ötküzüshi jeryanida yüz bergen bolup, weqe xitay herbiy we saqchiliri teripidin derhal bir terep qilin'ghan.

Beyge musabiqisi jeryanida 53 yashlardiki runggyé adak isimlik bir tibet puqrasi yerlik tibetliklerge nutuq sözlep, xitay da'iriliridin dalay lamaning tibetke qaytishigha yol qoyushni telep qilip, u qaytmighiche tibette heqiqiy diniy erkinlik bolmaydighanliqini tekitligen. Bezi texminlerde beyge musabiqisigha qatnashqan 200 dek tibetlikning qolgha élin'ghanliqi ilgiri sürülmekte. Lékin lisang rayonidiki herbiy we saqchi ponkiti bundaq bir weqe yüz bergenlikidin xewiri yoqluqini bildürdi. Shinxu'a axbarat agéntliqi bu heqtiki bir xewiride, runggyé adakning bölgünchilik pa'aliyetliri bilen chétishlighi barliqini bildürdi. Saqchilar adakning söz ‏- herikiti döletni parchilash we milletler ittipaqliqigha buzghunchiliq qilishqa qaritilghanliqi sewebidin toxtitip qoyulghanliqini élan qilghan.

Weqeni öz közi bilen körgüchilerning eskertishiche, runggyé adak nutqida yene benchen lama we tenzin délég rinpochilarni qoyup bérishke chaqirghan. 1995 -Yili 6 yéshida dalay lama teripidin benchen lamaning warisi, dep élan qilin'ghan gédun chokyé nyima, 12 yildin béri xitay da'iriliri teripidin nezerbent astida tutup turulmaqta. Tenzin délég rinpochi bolsa shu jaydiki inawetlik lamalardin béri bolup, xitay hökümiti uni térrorchiliq bilen eyiblep muddetsiz qamaq jazasigha höküm qilghan. (Erkin)