Tibet namayishchilar washin'gtonda xitay elchixanisigha tash - kések étip hujum qildi

31 ‏ - Mart düshenbe küni amérika prézidént sariyi - aqsaray aldida we washin'gton'gha jaylashqan xitay elchixanisining aldida tibetler we bir qisim Uyghurlar xitayning tibette élip bériwatqan basturush herikitige naraziliq bildürüp namayish élip bardi hemde namayishchilar xitay elchixanisi aldigha kelgende tash - kések étip xitay elchixanisigha hujum qildi.

Namayishqa 500 dek adem qatnashqan bolup, deslep ular aqsaray aldida namayish élip barghandin kiyin namayishni washin'gtondiki eng awat aylanmiliridin biri dupon sirkolgha yötkidi.

Gerche bügün washin'gtonda yamghur yéghiwatqan bolsimu, namayishchilarni righbetlendürüsh üchün namayish qollighuchiliri namayishchilarning her birige birdin yamghurluq we chüshlük tamaq tarqatti.

Namayishchilar xitay elchixanisi aldigha kelgende, deslep xitaygha qarshi "xitay tibettin chiqip ket!", "tibetke musteqilliq!", "shermende xitay!" dégen'ge oxshash shu'arlarni towlashti, kéyin namayishchilar téximu hayajanlinip, qollirigha botulka, qish parchiliri we tashlarni élip xitay elchixanisigha qaritip étip hujum qildi.

Netijide, xitay elchixanisining besh köz dérizisi chéqiwétildi hemde namayishchilarning beziliri xitay elchixanisigha ésiqliq xitay bayriqini éliwétish üchün xitay elchixanisigha yamashqanda saqchilar teripidin tosuwélindi.

Namayishning shekli hujum xaraktérini alghandin kéyin, neq meydan'gha 200 che amérika saqchisi keldi we töt etrapni qamal qilip binagha yamashqan we bezi tash atquchilardin bolup 5 - 4 neper tibet namayishchini qolgha aldi, emma bashqa namayishchilar belgilen'gen waqitta namayish meydanidin ayrildi. (Jüme)