Tibet mesiliside xelq'ara jama'etning xitaygha qaratqan bésimi kücheymekte

Xitay hökümitining tibette yolgha qoyghan basturush herikiti, bir tereptin xelq'ara ammiwiy teshkilatlar we tibetni himaye qilghuchi organlarning béyjing olimpik tenheriket yighinini bayqut qilish chaqiriqini kücheytiwatqan bolsa, yene bir tereptin gherb döletlirining, xitay hökümitini tibetning diniy dahisi dalay lama bilen söhbet ötküzüp, tibet mesilisini hel qilishqa qistishigha seweb bolmaqta.

Béyjing olimpik tenheriket yighinini bayqut qilish toghrisidiki chaqiriqlargha qarshi ikenlikini bildürgen, merkizi parizhdiki chégrisiz muxbirlar teshkilati we merkizi nyuyorktiki kishilik hoquqni közitish teshkilati qatarliq teshkilatlar bolsa, her qaysi dölet we hökümet rehberliridin, béyjing olimpik tenheriket yighinining ichilish murasimigha qatnashmasliqini telep qilmaqta.

Charshenbe küni rim papasi, 16‏ - bénidikt tunji qétim tibettiki qozghilang heqqide toxtilip, tibet mesilisini bir terep qilish we tibet xelqining tartiwatqan azabini toxtitish üchün munasiwetlik tereplerni söhbetke chaqirdi.

Rim papasi bayanatida, zorawanliq heriketliri mesilini hel qilmaydu eksiche, téximu murekkepleshtüridü, dégen.

Bu arida, dunya miqyasida élip bérilghan ray sinashta, tibettiki weqelerning xitayning dunyadiki obrazigha selbiy tesir yetküzüwatqanliqini, bolupmu gherb döletliridiki keng xelq ammisining xitay hökümitining tibettiki basturush herikitini qattiq eyibligenlikini otturigha chiqardi.

Ray sinash netijisige qarighanda, amérika xelqining 74 pirsenti, franisye xelqining 75 pirsenti we en'giliye xelqining 63 pirsenti, béyjing hökümitining tibetke qaratqan siyastini qattiq eyibleydighanliqini bildürgen. (Ömer qanat)